Kerala Blasters ngamtu Hyderabad an champion

Indian Super League khelh zawh a ni ta - Pathianni zan khan Hyderabad FC chuan Kerala Blasters chu penalty hmangin an hneh a, Indian football champion thar an ni.

Jawaharlal Nehru Stadium, Margao, Goa-a inkhelah fans sing chuang an pungkhawm a, team pahnih hi hun pangngaiah 1-1 in an inhnehtawk.

Blasters tana Rahul KP goal hmahruai khung chu substitute Sahil Tavora chuan Hyderabad tan a chhanglet a, extra time khelh a nih thlengin goal dang a lut tawh lo.

Penalty hmangin chak zawk zawn a ni a, Hyderabad tana pettu pali zinga pathumin an pet goal a, Blasters lamah pali zinga pakhat chiahin a pet goal thung - a tawpah 3-1 in Hyderabad an chak a, ISL champion an ni ta.

Blasters an phur
Kerala Blasters fan-ten an club inkhel en duhin Goa an pan a, stadium an chei mawi hneh hle - player lam pawhin fan-te phurna chu khelmualah an chhanglet a, inkhel ṭantir aṭangin an nawr nghal.

Minute 14-na lekah Blasters-in chance duhawm an nei nghal a, Harmanjot Khabra-a cross chu Alvaro Vazquez chuan goal-ah a chantir thei lo - Espanyol striker hlui Vazquez hian minute 39-naah crossbar a pet per bawk!

First half hun pek belh a ni a, Hyderabad kan hmu ve - hliam vanga lakchhuah Joel Chianese thlaktu Javier Siverio chuan chance duhawm a nei a, mahse, Blasters keeper Prabhsukhan Gill chuan ṭha zetin a lo dang.

Chawlhlawk hman hnuah Hyderabad-in bul an ṭan ṭha zawk a, Indian keeper ṭhangduang Gill bawk kan hmu - second half ṭan aṭanga minute lina leka Joao Victor-a hun neih duhawm a dansak chu a ṭha hle.

A hmuhnawm
Chawlhlawk hmaa hmuh tur tam lo Bartholomew Ogbeche-a theihna kan hmu ṭan a, mahse, Nigerian striker hian a chance neih hmasak chu uiawm takin a hlah.

Blasters an tawm rei lo. Minute 68-naah Rahul KP 'shot' naran tak nia lang chu Hyderabad keeper Laxmikant Kattimani chuan a man nghet zo lo a, goal a chhuah - Blasters dinhmun a ṭha takzet.

Hyderabad coach Manolo Márquez-a'n hun a ngah lo tih inhriain player a thlak danglam nghal a, goal nawr pui turin Halicharan Narzary leh Sahil Tavora te chu bench aṭangin a luhtir.

Minute 76-naah Ogbeche chuan freekick aṭangin ṭha zetin a pet a, Blasters keeper Gill-a'n a dang ṭha takzet - a per lehlam chu Juanan-a'n a khung thei bik lo a, vanneihnain Blasters lam a ṭang em ni chu aw, tih mai tur a ni.

A tawpah chuan...
Inkhel tawp nan minute hnih chiah a awm tawh - Blasters fans an zai a, player-ten champion nomawi an mitthla ṭan. Mahse, rin loh takin thil ropui bik a rawn thleng.

Márquez-a thutluknain awmzia a rawn nei a, bench aṭanga luhtir Tavora chuan goal ropui bik a khung - Hyderabad fans an sapatal a, Kerala ṭantute an ngawi rih thung.

Blasters tan Vazquez chuan hnai set sawt aṭangin tauh leh mah se a goal thei lo a, extra time khelh a ni. Blasters tan Jeakson Singh-a'n minute 101-naah bar a tauh per ve leh a, Kerala club vanduai hun a thleng.

Jeakson-a chance neih hmaa overhead kick hmanga goal khung tumtu Ogbeche-a'n chance duhawm a nei leh a, mahse, a goal khung ngei tura lang chu Marko Leskovic chuan line aṭangin a lo pet chhuak hman!

A chinfelna penalty
Team pahnihin goal an khung belh thei lo a, penalty hmangin Indian champion tur chinfel a ṭul. Blasters tan Leskovic, Nishu Kumar leh Jeakson ten an hlah vek a, Manjappada (Blasters sawina) tan Ayush Adhikari chiahin a chhuih lut.

Blasters player pathum pet hi Kattimani tan dan harsa lo vek a ni a, an pet ṭha tawk lo. Coach Ivan Vukomanovic pawh dem theih a ni - penalty an hnaih tawh tih hre chungin ball pet thiam K. Lalṭhathanga (Puitea), Jorge Diaz leh Vazquez te a la chhuak a, penalty pet tur a nei ṭha tawk lo.

Jorge Diaz thlaka lut Chencho Gyeltshen tal kha a pet zingah awm se, a danglam mai thei. Nishu Kumar phei chu a pet hmasak dansak ni mah se Kattimani-a'n line a pelh hman avangin pet nawntir a ni a, a pet goal chuang lo - an zam tlat!

Hyderabad tan erawh Javier Siverio-a'n a hlah tih loh chu Joao Victor, Khassa Camara leh Halicharan Narzary ten an pet goal vek a, penalty ṭha tak vek a ni.

ISL Lawmman
Champion Vbc. 6
Runners-up Vbc. 3
Semifinalist Vbc. 1.5
League Champion Vbc. 3.5
*Indian Super League lawmman atan hian vaibelchhe 15.5 sem ral a ni.

Kan la ui dawn chauh - Puitea
Tun season ISL-a Indian player langsar ber pawl thlang dawn ila, Bethlehem Vengthlang tlangval K. Lalṭhathanga (Puitea) hian tlarhnung a hauh bik hauh lo ang. Mizoram Premier League aṭanga hming chher midfielder hian tun season ISL-ah match 20 a khel a, assist vawi thum a nei - Blasters midfield khaikhawmtu a ni.

Puitea chuan, "Final hial kan lut a, kan champion zo ta lo chu uiawm tak a ni. Tunah hi chuan ui dan kan la thiam lo zawk a, kan ngaihtuah let ang a, kan la ui dawn chauh ang," tiin Vanglaini a hrilh. Puitea hian ISL final-ah bul a ṭan a, minute 98-naah coach-in a la chhuak - khelmuala hun a hman chhungin Mizo midfielder hi a khel ṭha hle.

NorthEast United aṭanga ISL-a a career ṭantu Puitea chuan, "Final-ah kan inhnehtawk a, a tawpah chuan a phu zawk an champion ta a ni e. Keini ai chuan Hyderabad hi an awm ho rei tawh a, keini aiin an inhrechiang zawk a ni," a ti a, chak loh chhuanlam a zawng lo.

Puitea chuan, "Tun season chhung zawnga Mizo mipuite min duhsaknaah ka lawm a, min ṭawngṭaipuitu tam tak an awm tih ka hriatin ka lawm a ni. "Bethlehem Vengthlang mipuiten min ngaihven reng a, final phei chu a huhoa enin min lo ṭawiawm a, kan veng mipuite min ṭawiawmna hi a ropui ka ti hle," a ti.

MPL-a BVT tan pawha lo inlan tawh Puitea chuan," Mizoram Football Association hruaitute min duhsakna hi sawi lan a ngai leh ṭhin. Final-a kan tlawm hnuah pawh min biain min rawn hnem a, anni zara tun dinhmun thleng ka ni a, lawmthu ka sawi seng lo," tiin Vanglaini a hrilh.

Puitea chuan, "Ka nu leh pa, ka chhungte pawh ka tan an awm reng ṭhin avangin ka lawm a ni," a ti a, "Season tharah Blasters tan ka khel leh ang," tiin South Indian club-ah a contract hman zawh a tum thu a sawi bawk.

Mizo telna Hyderabad
ISL champion Hyderabad-ah Mizo player pahnih an tel a, goalkeeper Lalbiakhlua Jongte leh midfielder Mark Zothanpuia te an awm. Kum 19 mi Biaka hian season hmasa khan Hyderabad hi a zawm a, a kum a la nau deuh avangin a la inlan lo.

Mizoram Premier League-a Chanmari FC tana lo khel tawh Mark Zothanpuia'n tun season-ah Hyderabad tan match thum a khel a, a minute neih zat erawh 60 chiah a ni. Kum 19 mi midfielder hi Indian footballer hmabak nei êng pawl a ni a, Serchhip rawlthar Mark Zothanpuia hian Pune City Under-18 tan pawh a lo khel tawh.

Indian Super League - Final
Hyderabad 1 - 1 Kerala Blasters
HYD: Sahil Tavora 88'
KER: Rahul KP 68'
*Penalty-ah 3-1 in Hyderabad an chak

Penalty pet dan
Kerala Blasters
Marko Leskovic X
Nishu Kumar X
Ayush Adhikari G
Jeakson Singh X
Hyderabad FC
Joao Victor G
Javier Siverio X
Khassa Camara G
Halicharan Narzary G

Mimal Lawmman
Emerging Player Roshan Singh, Bengaluru ( Nuai 4)FCGolden Glove Prabhsukhan Gill, Kerala Blasters (Nuai 2.5)
Golden Boot Bartholomew Ogbeche (18 goals), Hyderabad FC (Nuai 2.5)
Hero of the League Greg Stewart, Jamshedpur FC (Nuai 5)