Ferrari ropuina a la chuai lo

Formula team ṭha leh hlun, mahse tun hnaia che fuh hleithei lo Ferrari chu an rawn vul leh ta. Season bul ṭanna Bahrain Grand Prix-ah Ferrari car khalhtu Charles Leclerc leh Carlos Sainz te chuan pakhatna leh pahnihna dinhmun an luah.

Pathianni zana inelna neih ṭan hma chuan Max Verstappen leh Lewis Hamilton thawm a ring a, mahse qualifier an tlan aṭangin Ferrari chu team ṭha an nihna a lang. Leclerc-a'n a hmasa ber aṭanga bul ṭanin a hnungah Max a tlan thung.

Red Bull driver Verstappen leh Leclerc te an inum tawk hle a, vawi nga ngawt an dinhmun pawh an inthlak. Lap thum chauh tlan tur awm tawhah Dutch driver hi a car engine a chiang lo, a tlan tluan ve thei ta lo a ni.

Sergio Perez pawh a vanduai. Red Bull driver hi lap hnuhnung bera kawng kawi hmasaah a chesual a, a tlan tawp ve thei lo. Perez a vanduaina hi Hamilton tan vanneihna a ni thung - Mercedes driver hian podium a lawn theih phah.

Hnehna changtu Leclerc chuan, "Ka chak theih nan khan ka rilru zawng zawng ka hmang. Second khat lek pawh kha a uiawm a, dai pelh zeuh neih pawh a thiang lo. Khatiang taka inelna nasa leh hautaka ka chak thei kha ka lawm," a ti.

Champion lai Verstappen chuan a dinhmun sawiin, "Engine-ah khan fel lo a awm, ka khawl kha a thi dup mai a, chuvangin kawngsir lam ka pan," a ti. Team principal Christian Horner chuan eng tak nge dik lo lai an la hriat loh thu a sawi ve bawk.