Santiago Bernabeu-ah Xavi 'Barca' an lam

Xavi hnuaiah Barcelona an intuai thar a, an ṭha tak tak tih lantirna chu Pathianni zan khan an hmelma Real Madrid chu an mual Santiago Bernabeu-ah 4-0 in an sawp. Catalan club tan hian Pierre-Emerick Aubameyang-a'n goal hnih a khung bakah Ronald Araujo leh Ferran Torres ten goal khat ve ve an khung.

Real Madrid hi chak lo mah se point 66 hmuin pakhatnaah an awm chhunzawm a, pahnihna Sevilla leh Real Sociedad te an inhnehtawk avangin point kua ngawtin an sang fal. Amaherawhchu pathumnaa awm Barca-in match khata khel tlemin Los Blancos hi point 12-in an pha lo a, Xavi chuan champion beiseina a la awm thu a sawi.

Football hmuhnawm
El Clasico-ah Cristiano Ronaldo leh Lionel Messi te an tel lo a, amaherawhchu Xavi hnuaiah Catalan club an intuai thar mek avangin Real Madrid leh Barcelona inkhelh hma hauhin boruak a sang.

Los Blancos-in Federico Valverde hmangin goal chance an nei hmasa a, keeper Marc-Andre ter Stegen-a'n ṭha takin a dang. Barcelona an insiamrem a, Ferran Torres cross ṭha chu hnai tak aṭangin Auba-a'n a hlah a, Thibaut Courtois-a'n a dang ṭha bawk.

Barca-in vei leh ding aṭangin an nawr a, Torres leh Ousmane Dembele ten an theihna sanzia an pholang. Borussia Dortmund aṭanga inhrechiang tawh Dembele leh Auba ten an theihna an la in hre tawn a, minute 29-naah Dembele cross chu Aubameyang-a'n a tauh goal.

Real Madrid pawhin an nawr ve tho a, Brazilian star Vinícius Júnior-a'n ṭha taka lalutin keeper Ter Stegen hmaah a tlu. Penalty awm tak niin lang mah se replay ennawn hnuah erawh penalty tur a ni lo. Barca-in corner kick an hmang ṭangkai a, minute 38-naah Ronald Araujo-a'n tauh lutin dinhmun an insiamrem theih phah.

Barca an thiam
First half-ah Barca-in 2-0 in hma an hruai tawh a, second half-ah an nawr chhunzawm. Xavi enkawl Barcelona-in an thiamzia an pholang. Man City aṭanga Barca zawmtu Torres-a'n keeper chiah a hmachhawn hnuah goal-ah a chantir thei lo.

Torres a vanduai rei lo a, minute 47-naah Aubameyang pass tawih zet chu goal kilah tak a khung. Goal class bikah hian team goal bakah player theihna sang pholanin a awm a, Torres leh ball petu Auba bakah Frenkie de Jong te thiamzia hmuhin a awm.

Barca an phur tulh tulh a, Torres-a'n minute 51-naah ball ṭha petu Auba chu ball ṭha bawkin a thungrul a, Gabon international hian cool zetin a pet goal. Referee-in offside-ah ngai mah se VAR hmanga ennawn a nih hnuah Barca-in dan ang thlapin Real tlarhnung an ṭhiat tih a hmu ta zawk.

Catalan club-in goal li an khung hnuah pawh ball an chang tam a, vawi 695 zet an in pass laiin Real Madrid-in vawi 471 chauh an in pass. Xavi naute hian 60% ball an chang bawk a, goal li an khung a ni ringawt lo a, goal tam zawk khung thei dinhmunah an ding.

Barca thar
Xavi-a'n Barcelona a enkawl ṭantirh khan Champions League-ah beiseina an la nei a, amaherawhchu team dinhmun a chhiat em avangin Allianz Arena-a point khat hmuh pawh thil theih loh ang hialin a lang.

Barca-in rinlawk ang ngeiin Bayern Munich chu 3-0 in an ngam lo a, chutihrualin Xavi hnuaiah an insiamṭha hret hret. Harhtharna tak tak a thlen theih nan January transfer a pawimawh a, thlasik bazarah Adama Traoré, Ferran Torres, Pierre-Emerick Aubameyang leh Dani Alves te an lalut.

February a thlen meuh chuan Barca-in khelmualah ball an inpe kual leh tawh a, Nou Camp-ah Atlético Madrid an kat kual thei tawh. An dinhmun ni loin an khelh dan thlirin La Liga chauh ni loin khawvel team ṭha ber zinga mi an ni leh tawh a, tun season-ah season thara Champions League khelh chauh beisei loin nomawi an beisei tawh zawk.

Barca manager Xavi chuan, "Nomawi kan chawi thei ang em, tih ka hre lo a, engpawh a la thleng thei. Kan tlai hret a ni thei a, chutichung chuan El Clasico-a chak hi kan tan a hlu a ni. Real Madrid ai khan kan ṭha zawk a, mahni mual ang maiin kan khel. Kan inkhel kha en a nuam a, Barca manager ang chauh ni loin fan ang pawhin en a nuam," tiin sawi a, goal tam zawk khung thei an nih thu a sawi.

Benzema tel lohna
Real Madrid an khel ṭha tawk lo a, Karim Benzema awm loh an tuar bawk. French forward hian tun season La Liga-ah goal 22 a khung tawh a, assist vawi 11 a neih tawh miau avangin player ṭha bik an chân tih a chiang.

Italian manager Carlo Ancelotti chuan, "Second half-ah khan tlarhnungah 1 vs 1 kan tum a, striker pathum hmachhawn turin defender pathum kan dah. Kan thil tum a hlawhchham a, ka thiam loh a ni," tiin mawhphurtu a nih thu a sawi.

Real tan hian Thibaut Courtois a khel ṭha a, vawi ruk save ṭha a nei a, hei vang hian an mualphona tur a ziaawm. Ancelotti chuan, "Kan chak loh dan hi a hrehawm. Chutihrualin kan dinhmun hi a ṭha a, table chungh berah kan awm. A chhe lam thlir loin hmasawn zawnga kan kal a ṭul a ni," tiin insiamṭhat ran an mamawh thu a sawi.

Real Madrid hian April 2, Inrinni zanah Celta Vigo an hmachhawn leh chauh dawn a, inpuahchahna hun ṭha an nei. Barcelona-in April 3, Pathianni zanah Sevilla an mikhual dawn a, hnehna an chang a nih chuan pahnihnaah an awm chho thei ang.