Marquez dinhmun a ṭha

Moto GP season an ṭan a, intlansiak hmasa berah Miguel Oliveira a chak. Hnehna changtu Oliveira chanchin aiin warm-up session laia Marc Marquez chetsual dan chuan sawi zui a hlawh zawk - Honda rider hian hliam na tak erawh a tuar lo hlauh.

Pathianni tlai Indonesian Grand Prix chu ruah surin a tibuai deuh a, inelna erawh neih tlang theih tho a ni. Portuguese tlangval, KTM bike khalhtu Oliveira hian a hmasa ber aṭanga tlan Fabio Quartararo chu 2.205 second in a hneh a ni.

Honda bike khalhtu Marquez erawh a vanduai. Kawng kawiah 180km/h a chakin a tlan a, ti buaitu nei lo mah se a chesual. A bike a tlu a, amah sang takah invawrhin, amah aia sangah bike a invawrh.

Spanish tlangval hi tlan kawngah thui angreng tak a thleng, a bike boruaka invawrh kang rawn tla leh chuan Marquez hi a delh teuh hle. 2020 season ṭan nia hliam na tak tuar tawh a nih avangin a chanchinin ngaihven a hlawh.

Kum 29 mi Marquez chuan, "Ka dinhmun a ṭha e. Kan tan chuan kar tawp fuh lo tak a ni, a tir aṭangin harsatna neuh neuh kan nei nghal. Ka chetsual hnu khan damdawi inah kan kal nghal a, natna hran ka nei lo," a ti.