Vawiinah Legrand Cup quarterfinal

Legrand Cup, MFA Futsal 2021-22 Season Opening Tournament quarterfinal chu vawiin hian KK Futsal Ground-ah khelh a ni ang. Division One-ah team 62 an awm a, tunah chuan team ṭha pariat Armed Veng South FC, Cheat Day FC (Republic Veng), Goshen FC (Sihphir Venghlun), JK FC (Zuangtui), Muthi FC, NSC Samu Hmar FC (Nursery), Thlangtiang FC leh Tuikual North FC te chiah an dam tawh.

Nimin khan KK leh TBC Futsal Ground, Durtlang Leitan-ah Division One club-ten last 16 an khel a, team an intluk tawk hlawm hle. Last 16-ah hian match riat chauh khelh a ni nachungin goal 68 tehmeuh a lut. Inkhel hmuhnawm zingah Zuangtui club M & B FC leh Muthi FC te inkhel a nung ṭha a, inkhel boruak sang takah hian Muthi 7-6 in an vannei ta zawk.

Division One quarterfinal hi tlai ni nem leh zanah khelh a ni dawn a, tlai dar 4:00 aṭangin khelh ṭan a ni ang. Inelna sang zawk Futsal League-ah erawh team li chauh an dam tawh a, semifinal hi March 24, Ninganiah khelh tur a ni.