FA Cup: Semifinal-ah Liverpool vs City

Liverpool chuan Pathianni zan khan FA Cup quarterfinal-ah Nottingham Forest chu 1-0 in an hneh a, Diogo Jota goal hmanga hnehna changin semifinal an lut - Manchester City nen an intawng dawn.

Liverpool inlan hmain City hian 4-1 in Southampton an sawp a, Raheem Sterling, Kevin de Bruyne, Phil Foden, Riyad Mahrez leh Aymeric Laporte ten goal khat ṭheuh an khung - defender Laporte khung erawh anmahni lama a tihluh a ni!

Zantir inkhelah Crystal Palace chuan Frank Lampard hoa talbuai Everton chu 4-0 ngawtin an sawp a, semifinal-ah Inrinni zana Middlesbrough hnehtu Chelsea an hmachhawn ang.

Reds an chak
Liverpool boss Jurgen Klopp-a'n Forest lakah Mohamed Salah, Sadio Mane leh Andy Robertson a chawlh hahdamtir a, Trent Alexander-Arnold chu hliam vangin a chhawr thei lo bawk.

Liverpool-in inkhel thunun mah se goal khung an harsat a, Roberto Firmino-a'n chance duhawm hlah lo se hma taka hmahruai thei tur an ni. Mahse, minute 78-naah Tsimikas-a siamsak chu Jota'n a khung a, Reds an chak.

Forest-in chak loh chhuanlam tur an nei - midfielder Ryan Yates chu Liverpool goalkeeper Alisson nen ball an inchuhna lamah a tlu a, mahse, VAR hmanga ennawn a nih hnuah an penalty beiseina a thamral a, Philip Zinckernagel chance hlah a uiawm viau bawk.

City beiseina
Pep Guardiola enkawl City-in Saints laka hnehna chang turin harsatna an tawk lo - Raheem Sterling chuan minute 12-naah goal hmahruai a khung a, Laporte chuan first half hun pek belhah an lama tilut palhin Saints a sutsak!

Mahse, second half-ah City-in goal an surtir. Minute 62-naah Mohammed Salisu chu Gabriel Jesus lakah hlauhawm takin a che a, penalty a chawi - hei hi KDB chuan goal-ah a chantir a, Foden leh Mahrez ten khung ve lehin an chak chiang.

City inlan hmaa inkhelah Palace-in Everton an sawp a; Marc Guehi, Jean-Philippe Mateta, Wilfried Zaha leh Will Hughes ten goal an khung a, season hmasa finalist Chelsea nen final luh an inchuh ang.

Klopp a pawr!
Liverpool boss Klopp chuan, "Final khelh kan duh chuan City tawn kan ngai dawn tih kan hria, eng inelnaah pawh thlen thui chuan City hi hmachhawn zel an ngai.

"Eng team tan mah tum kan châkawm lo ang tih ka ring a, harsa dawn mah se City tan pawha harsa ve turin kan khel mai tur a ni," a ti a, vaupung a ti na lawk hle.

Reds hi League Cup-ah an champion tawh a, Premier League-ah City nen inel ber an ni mek a, Champions League-ah quarterfinal an lut ve ve tawh a, FA Cup semifinal-ah an intawng leh dawn ta - English club pahnih inel chanchin hi a ngaihnawm tawlh tawlh dawn.

March 19, Inrinni Zan
Middlesbrough 0 - 2 Chelsea
CHE: Romelu Lukaku 15'; Hakim Ziyech 31'

March 20, Pathianni Zan
Crystal Palace 4 - 0 Everton
CRY: Marc Guehi 25'; Jean-Philippe Mateta 41'; Wilfried Zaha 79'; Will Hughes 87'

Southampton 1 - 4 Manchester City
SOU: Aymeric Laporte 45+2' (OG)
MNC: Raheem Sterling 12'; Kevin de Bruyne 62' (P); Phil Foden 75'; Riyad Mahrez 78'

Nottingham Forest 0 - 1 Liverpool
LIV: Diogo Jota 78'

Semifinal : April 16 -17, 2022
Manchester City vs Liverpool
Chelsea vs Crystal Palace