Son leh Kane awmna Spurs an sang zel

Son Heung-Min-a goal hnih hmangin Tottenham Hotspur chuan West Ham United 3-1 in an hneh. Antonio Conte naute hian Manchester United nek chhuakin Premier League table-ah pangana dinhmun an luah.

Pathianni zan London Derby-ah West Ham defender Kurt Zouma-a'n anmahni lamah goal a khung a, forward Son-a'n chawlhlawk hmain a khung belh. South Korea international hian hun tawp dawnah chak nemnghehna a khung bawk.

Son a langsar a, a phenah Harry Kane a awm. England captain hian Son-a goal khung tur pahnih hi a siamsak a ni a, defender Zouma-a'n anmahni lama a tih luh pawh hi Kane-a cross tho niin, goal khung lo mah se a thawh hlawk hle.

Spurs manager Conte chuan, "Thil tum kan nei, kan tum chu palina nih phak a ni. He hmun ka rawn pan hma kha chuan palina nih phak kha thil huphurhawm a ni, thla nga chhung hna kan thawh ho hnuah erawh kawng a awm tih a chiang.

"Palina inchuh zingah hian a tawp thlenga tel ka duh. A harsa dawn tih hre mah ila theihna kan nei, ka ngaihdan chuan team pathumin palina dinhmun hi kan inchuh niah ka ngai," a ti a, an khelh hmabak zingah Liverpool chu harsa ber tur an ni ang.

North London club hian match 29 aṭangin point 51 an hmu, palina Arsenal chu point thumin an phak lo - Gunners hi match khatin an khel tlem zawk. Pangana Man United pawhin point 50 an nei a, inelna a la nung chho dawn hle.

Inkhel dangah Leicester City chuan Brentford 2-1 in an hneh bawk. Foxes tan Timothy Castagne leh James Maddison ten goal mawi an khung a, mikhual Bees tana Yoane Wissa-a'n box pawn aṭanga a khung pawh mawi tak a ni.