Nadal hnehin Fritz a champion

Dal theih loh ang maia kal tluang Rafael Nadal chuan dal theitu a tawng. Indian Wells final-ah Nadal hian Taylor Fritz chu 6-3, 7-6 (7-5) in a hneh lo, tennis season kal laia a chak lohna hmasa ber a ni.

California thlalerah hian thli a thaw nasa ṭhin a, player tam takin harsatna an tawk nasa. Nimin zinga final inkhelah pawh Nadal chu harsatna tawk zawk a ni, set khatnaah 4-0 in a hniam laiin enkawl lailawk a ngai hial.

Grand Slam vawi 21 champion tawh Nadal chuan, "Thawk a harsa, boruak hip luh ka tum kha ka awm a na ṭhin. Ka lu a na bawk a, ka tan ni ṭha lo a ni. Chhuanlam atana hman chi erawh a ni lo, ka khel tluan thei kha ka lawm," a ti.

Spanish star hian season a hmang ṭha viau, a match hmasa 20-ah a chak vek. Tun ṭumah erawh a tihsual vanga a khingpuiin point a hmuh hi 34 zet a tling a, set hnih khelh chhunga tihsual atan chuan a tam mah mah.

American Fritz tan Nadal hneha champion hi thil lawmawm bik a ni. Andre Agassi (2001) hnuah tualchhung player zinga Indian Wells champion leh thei hmasa ber a ni a, mipui ṭan pawh a hlawh hle.

Kum 24 mi Fritz chuan, "Boruak awm dan avang khan ka tan pawh inkhelh a awlsam lo, match ṭan hma aṭangin a harsa ṭan tawh. Player ṭha tak hneh chunga nomawi chawi hi chu ka beisei ngam loh thil a ni," a ti.