Palinaah Juve an nghet

Serie A champion beiseina a la bo lo a, beisei erawh a sang tawh lo - Juventus tan palina nih phak erawh thil harsa a ni dawn lo. Old Lady hian Salernitana 2-0 a hnehin Champions League khel phak chinah an dinhmun an sawhnghet.

Juve tan Paulo Dybala leh Dusan Vlahovic ten goal khat ve ve an khung. Chak lo Salernitana erawh a hniam berah an awm chhunzawm, point 16 chauh an la hmuh avangin Serie B lamah an tlahniam leh ngei dawn tih a sawi ngam.

Pathianni zan inkhel dangah, striker Tammy Abraham-a goal hnih hmangin AS Roma chuan Lazio 3-0 in an hneh. Jose Mourinho team tan Abraham bakah Lorenzo Pellegrini chuan goal khat a khung ve bawk a, paruknaah an kaisang.

Chelsea aṭanga an lei Abraham hian tun season Seris A-ah goal 14 a khung tling ta. English player zingah Gerry Hitchens hnu lama, Italian football inelna sanga season khat chhunga goal 14 khung tling leh thei hmasa a ni, kum 60 liam hnuah record a nihrual leh chiah.