Iga Swiatek tan nomawi

BNP Paribas Open khelh zawh takah Iga Swiatek a champion. Pathianni zing final inkhelah Polish nula hian Maria Sakkari chu 6-4, 6-1 in a hneh a, season duhawm a hman a chhawm nung zel.

Kum 20 mi Swiatek hian Australian Open-ah khan semifinal a lut, chumi hnuah Dubai lamah a champion - tunah California thlalera thli thaw tak hnuaiah hlawhtlinna a chang chhunzawm.

Tun kara world ranking chhuak tharah chuan Swiatek hi pahnihna a ni dawn, a chungah Ash Barty chiah a awm ang. Australian star Barty hi Indian Wells-ah hian a inlan ve lo.

French Open champion hlui Iga Swiatek chuan, "Tournament ka khelh hnuhnungah khan ka khel ṭha ka inti ve hle, hetiang chena rei ṭha taka ka khelh theih kha ka beisei ngam lo zawk hial, mahse ka duhthusam chu a takin a thleng," a ti.

Season kal laiah Swiatek-i'n match 23 khel tawhin ṭum 20 zet hnehna a chang thei, tun hnai bikah a zawnin vawi 11 hnehna a chang. Kum bul a ṭan chauh a ni a, a tan kum ṭha a nih chhunzawm ngei a beiseiawm.

Chak lo mah se Sakkari pawh a ranking a san phah dawn. World number 6 ni lai hi ranking tharah chuan pathumna a ni dawn. Greek tennis player zinga ranking sang ber a ni ang.