PSG chak loh chian ber ṭum a thleng

Paris St-Germain chuan season kal laia an chak loh chian ber ṭum an tawng. Pathianni zan Ligue 1 inkhelah Paris club hi AS Monaco khelmualah 3-0 in an tlawm, hliam vangin Lionel Messi chu a inlan ve lo.

Monaco tan Wissam Ben Yedder-a'n goal hnih a khung a, goal khat dang hi Kevin Volland khung a ni thung. Kylian Mbappe-a'n a chawr chhuahna lakah goal a khung thei lo, player man tam Neymar pawhin danglamna a siam thei bik lo a ni.

Mauricio Pochettino-a naute hi chak lo mah se table-ah point 12 zetin hma an la hruai fal. Amaherawhchu, tun hnai khualmuala league match an khelh hnuhnung pathumah an tlawm vek, an player neih dan chhutin thil zahthlak a tling.

PSG manager Poch chuan, "Inelna pawimawha kan chak loh dan hi pawm thiam chi a ni lo. Champions League aṭanga kan tlak avang khan league lamah kan ṭang lehzual tur a ni a, mahse chumi letling chiah chuan kan awm," tiin a naute khelh danah a lawm lo.

Real Madrid an hneh loh hnu an match hmasa berah, PSG fans ṭhenkhatin Messi leh Neymar an 'boo' hial. Tun ṭumah Messi tel loin an khel a, goal hlauhawm insiam an harsat. April 2019-a Lille (5-1) an hneh loh hnuah an chak loh chian ber ṭum an tawng.