Bale-a'n Real a chhuahsan hmel loh

Gareth Bale-a'n European Championship khel tura an ram Wales an kaipui zawhah 'A indawh dan ang hian - Wales, Golf, Madrid' tih chuanna banner kengtu zingah tel a, November 2019 thil thleng hi Real Madrid ṭantute ngaihdan a ni lo hle. Tunah erawh boruak a dang tawh, Bale-a agent Jonathan Barnett chuan kumin nipuiah pawh Welsh forward hian Spanish club lian hi a chhuahsan a rin loh thu a sawi.

Gareth Bale hian a hun laia khawvela player manto ber ni turin kum 2013 khan pound maktaduai 85.3 in Real Madrid a zawm. Welsh forward hi hliam vang leh Cristiano Ronaldo vanglai a tawnfuh avangtein beisei a pha lo.

Chutihrualin Bale awm hnu hian Real Madrid-in La Liga leh Copa del Rey nomawi pakhat ve ve bakah Champions League nomawi pali an chawi tih theihngilh loh a ṭha. Chutichung chuan league lama an hmelma Barcelona an elphak loh avangin Bale hi a tuartu zingah a tel.

Kum 30 mi Bale hian Spain khawpui Madrid-ah kum sarih tehmeuh a awm tawh chungin an ṭawng Spanish hi langsarin a hmang ngai lo a, hei hian sawisel pawh a hlawh phah hle. Ronaldinho khan 2002 FIFA World Cup zawha PSG a zawm khan French ṭawng a zir a, tun thlengin thiam takin a ṭawng thei.

Pep Guardiola pawhin Bayern Munich a enkawl hma thla rukah contract ziak tawhin German ṭawng hmang thei turin hun a nei a, interview hmasa ber pawh German-in a nei. Pep hian duhthusama nalin ṭawng hmang lo mah se fak a hlawh hle. Marcelo chuan, "Bale hian Spanish hmang loin English chauh a hmang a, a bakah chuan kut zei zirin a ti ṭhin," tiin a sawisel. Bale hi Spanish ṭawng duh anga a hman theih loh avangin sawiselna a tawk nasa a, Welsh forward ṭawng zirtirtu erawhin chhanin Spanish a thiam thu a sawi. Chutihrualin a zahzum leh ṭawng hman lamah a inkiltawih thu a sawi lang thung.

Real Madrid ṭantuten result ṭha an duh laiin Bale erawh a tuina pakhat zawk golf khelh lai thlalak hmuh tur a awm fo. Nikum February khan keeper Thibaut Courtois chuan Bale hi club aia thil dang a ngaihtuah nasa tiin a sawisel hial.

Belgian keeper Courtois chuan, "Ramos hi 'hruaitu' tihin kan hria a, Modric-a'n finna hi a lar pui a, Bale erawh 'golfer' tih a ni thung. Talent ṭha tak a nei chunga thil dang vanga a thlen tur ang a thleng lo hi a pawi a ni," tiin a sawi.

Bale hian season ṭan hmain coach Zinedine Zidane nen buaina an nei zui a, French manager hian Welsh forward hi chhuahtir a tum thu a sawi ngun hle. Transfer lai pawhin China club zawm tura sawi a awm hman a, amaherawhchu club hotuten man nei loa chuahtir an ngaih ngam loh avangin a kal ta lo.

Welsh foward Bale hian an sawiselna hi a hre kar a, hemi tih el nan hian November 20-a Hungary an hneh ṭumin pawhin  'A indawh dan ang hian - Wales, Golf, Madrid' tih chuanna banner chu inthlahrunna nei miah loin a keng. Hemi hnu hi chuan club nena boruak a ṭhat loh bawk avangin chhuak ngei tura ngaih a ni.

Gareth Bale hian tun season-ah match 14 chauh khelin goal hnih chauh a la khung a, chutichung chuan Real Madrid-ah a cham zel dawn.

Bale-a agent Jonathan Barnett chuan, "January laiin khawiah mah a kal dawn lo. Nipuiah pawh a chhuah a rinawm lo zawk," tiin a sawi. Welsh forward hian October 2016 khan kum 2022 thleng daih turin contract a pawtsei.

Real Madrid hian Jeddah, Saudi Arabia-ah Pathianni hian Super Cup final Atletico Madrid nen an khel dawn a, Bale erawh hliam vangin semifnal-a Valencia an hneh ṭum pawhin a inlan lo. Zinedine Zidane chuan final-ah pawh Bale hi a inlan loh tur thu a tichiang tawh.

La Liga erawh January 17, Zirtawpni zan aṭangin khelh ṭan a ni dawn a, Real Madrid hian January 18 zanah Sevilla an mikhual ang.