Zaninah tualchhung player ṭha inlan dawn ; Dar 7:30-ah Aizawl FC Vs Mizoram Police
Mc Dowell's No. 1 Soda Mizoram Premier League semifinal first leg-ah Aizawl FC leh Mizoram Police te zanin dar 7:30 hian an inhmachhawn dawn a, tualchhung player ṭha awm khawmna a nih avangin inkhel hmuhnawm a ni ang.
MPL vawi hnih champion tawh Aizawl FC-in I League-ah East Bengal an hneh avangin an phur thar dawn a, Police hi league round-ah vawi hnih an hneh avangin team ṭha zawka ngaih an ni a, amaherawhchu an player neih dan thlirin chak tur zawk a hriat lawk theih loh thung.
Vawi 2 chak lo
Mizoram Police-in tualchhung player ṭha rual kawl si eng vangin nge Aizawl FC ṭum hnih an hneh loh tih zawhna a awm thei a, chhanna chi hnih a awm thung. September thla laihawla an intawn hmasak ṭumin Aizawl FC 3-1 in an chak a, Police an kim loh bakah I League vangin Gift Raikhan-a hote an la buai lo.
November thlaah Police-in a ṭum hnih nan AFC an hneh lo a, chhuanlam tur an nei lo. Lalbiaksanga Colney hote player kimin an khel a, AFC 'B-Team' tia chhal theih an hmachhawn avangin an zuam sual tia sawi theih dan a awm. Chutihrualin hriat tel atana pawimawh erawh Police defender pawimawh Lalrinzuala Khiangte chu AFC-a contract nei lai a nih avangin I League club a hmachhawn ve thei lo a, Rinzuala awm loh a lang.
A danglam dawn
Police coach BS-a Colney chuan, "Rinzuala hi defender ṭha tak a ni a, chutihrualin a thlakna tur kan nei a. Ronald-a leh Manunga te right back a khel turin an ṭha tawk," tiin an buai nawn loh tur thu a sawi.
An khingpui tur chungchang sawiin BS-a chuan, "Aizawl FC hian I League-ah hnehna an chan avangin an phur lai tak a ni a, khelh an harsa dawn. Hneh kan duh a nih chuan kan tlan tam a ngai a, player zawng zawngin an theihna zawng zawng an chhuah a ṭul a ni," tiin Vanglaini a hrilh.
Police hian MPL-ah nomawi an la chawi lo a, final an thleng ngai lo. Tun hi an tan hun ṭha a nih avangin an hlah loh a ṭul a, chumi tur chuan MPL nomawi chawi tawh Malsawmfela, R. Malsawmtluanga, F. Lalrinpuia leh Lalbiakhlua te an chet ṭhat a ṭul a; tun hma aṭanga Police innghahna Lalfakzuala, V. Lalṭanpuia leh Lalramtharmawia ten an hna chan an hneh a ṭul bawk ang.
Champion duh AFC
Aizawl FC coach Gift Raikhan chuan, "I League leh Mizoram Premier League hi kan ngai pawimawh ve ve a, champion ve ve kan duh. MPL-a kan chet ṭhat loh chuan pressure kan nei dawn a, chuvangin Police hi hneh ngei kan duh a ni," tiin chak an duh thu Vanglaini a hrilh.
AFC hian Inrinniah I League match an nei a, ni khat an awl hnuah MPL an khel leh nghal dawn. Hei vang hian AFC coach-in a duh ang thlap player a thlang thei dawn lo a, an chhe dawn tihna erawh a ni lo.
Gift chuan, "East Bengal nena kan inkhel kha a hautak a, chuvangin player thlan thiam a ṭul. Ka player-te hi an ṭha vek a, I League khel leh ka awltir ṭhenkhat te ka chawhpawlh dawn. Police nen hian Mapuia, Remsanga leh Fela ten hmun pawimawh an chang ang," tiin a sawi.
Kelkang tlangval Mapuia hian Police an hmachhawn hnuhnung berah chakna goal a khung a, Lengpui tlangval Remsanga'n MPL-ah goal nga a khung tawh a, Lalruatfela Zote hi MPL5 best midfielder niin tun season-ah minute a nei tlem chungin goal hnih a nei tawh. Nimin tlai thleng khan AFC coach Gift hian foreigner chungchangah thu chiang a la nei thei lo a, MPL a ngai pawimawh a nih chuan tualchhung football khel thei tura ziah luh Alfred Kemah Jaryan, Ansumana Kromah leh Bektur Talgat te bul an ṭan a nih loh pawhin chhawr theih turin an awm ang.