A vawi ruk nan Mary Kom a champion

MC Mary Kom chuan khawvel boxer ṭha chungchuang bik a nih zia a lantir leh ta. India nula hian Inrinni khan Ukraine boxer Hanna Okhota chu 5-0 a hnehin World Championship-ah a vawi ruk nan a champion.

Manipuri boxer hi 48kg category-ah inlanin pakhatna ni tur hian harsatna liantham a tawk lo. K D Jhadav Stadium-a inhnekah kumin kum tir lama a hneh tawh tho Okhota lakah hian 30-27, 29-28, 29-28, 30-27, 30-27 in a chak nawn a ni.

Fa pathum nei tawh Mary Kom hi kum 35 mi a ni tawh a, a kum tam deuh tawh mah se a tiatpuiah chuan khawvela a ṭha ber a la ni reng. Kom chuan, "Rio Olympic atan ka tling zo lo a, tunah chuan 2020 Tokyo Olympic-a inlan theih ngei ka beiseina a sang ta hle," tiin chawlh mai a la tum lo.

Mary Kom chuan sawi zawmin, "Ram mipui thlawpna ka hmu ṭha a, kei chuan gold medal hi ka pek let theih sang ber che u a ni. Olympic-ah 48kg category a awm loh avangin 51kg huangah ka inlan a ngai dawn a, boxer lian leh sang zawk nena inbeih a ngaih dawn avangin inbuatsaihna chauh pawh a hautak dawn," tiin a sawi.

World Championship-ah hian India tan Mary Kom bakah hian Lovlina Borgohain (69kg) leh Simranjit Kaur (64kg) te chuan silver leh bronze medal an la bawk a, kum 2006-a record an lo siam tawhna tluk lo deuh mah se an thlen chin hi a chhe lo.