Aizawl FC harhna Kelkang tlangval

Kelkang tlangval Lalkhawpui-mawia hmangin Aizawl FC-in tun season-a a vawi khat nan I League-ah hnehna an chang a, an club hneh erawh India rama club hlun ber zinga mi East Bengal an ni.

Mizo club tan Leonce Dodoz chuan goal hmahruai a khung a, East Bengal-in Jobby Justin leh Borja Gomez Perez goal hmangin lehthal mah se AFC-in hnehna chang turin goal hnih thoin an chhang let. Lengpui tlangval Joe Zoherliana'n AFC siphurh sutna goal a khung hnuah Mapuia'n chakna goal a khung.

Gift Raikhan-a hoten hnehna an chan avangin table mawngphah an chhuahsan a, team 11 inelna I League-ah pakuana dinhmun an hauh a. Season bul ṭan ṭha East Bengal erawh match hnuhnung pahniha an chak loh avangin palina dinhmun an hauh thung.

Mizo an tam

Aizawl FC result ṭhat tawk loh vang te, MLA inthlanpui awm avang te leh publicity ṭhat tawk loh avangin East Bengal meuh pawhin entu mipui a sawm chhuak tam thei lo a, RG Stadium-a kal hram erawh inkhel hmuhnawm chhawp sak an nih avangin an inchhir lo ang.

Kolkata club tan Lalrindika Ralte-in captain armband rawn hrengin Mizo dang pathum Lalram-chullova, Brandon VL Remdika leh R. Laldanmawia te an club hmachhawn turin an inlan vek. Aizawl FC lamah pawh Mizo an inlan tam a, player 11 aṭangin pasarih ngawtin bul an ṭan a, captain Alfred Kemah Jaryan chu tlarhnungah pawh let a nih avangin midfield khaipa chu Zemabawk North tlangval David Lalrinmuana a ni.

India rama football inelna sang I League-ah Mizo 11 ngawtin starting eleven an chang thei a, Mizo mipui tan inchhuanna tham a awm.

A nung phat

Ṭan phat aṭangin inkhel a nung nghal a, minute 13-na lekah Didika pawhin ṭan vangin yellow card a hmu nghal - chak tuma ṭan vang a ni. East Bengal an chungnung hret a, AFC-in goal an khung hmasa zawk. Minute 26-naah keeper Ubaid CK dan per chu Leonce Dodoz-a'n goal-ah a chantir a, first half-ah Mizo club an ṭang tluan.

Chutihrualin East Bengal an vanduai a, Manoj Mohammad-a throw in chu Enrique Esqueda-a'n goal pawnah chiah a pet a, Chullova freekick ṭha zet chuan crossbar a per hnuin goalline pel mah se referee-in a hmuh hmaih a, East Bengal player-ten hemi per hi an khung thei lo bawk.

Second half-ah Kolkata club-in inkhel an thunun rah an seng a, Chullova freekick ṭha zet chu Jobby Justin-a'n minute 62-naah a tuah lut a. Minute riat hnuah Chullova corner aṭanga ball kal chu buai nuaih karah defender Borja-a'n hmahruai nan a khung.

Tlawm duh lo Mizo

Ṭum dang ang thoin Mizo club an chak lo leh dawn niin a lang a, an rilru put hmang leh an thinlung erawh 'chak duhna' a ni. Minute 73-naah substitute David Lalbiakzara corner pet chu East Bengal keeper Ubaid-a'n ti perin Joe-a'n Aizawl FC siphurh sut nan a hmang.

Coach-in min chhawrna apiangah team ṭhatna tur a nih chuan ka khel ang titu Dodoz chu mual sir lamah sawn a ni a. Ivorian forward hian vei lam aṭangin cross ball duhthusam a pet thla a, Kelkang tlangval Mapuia'n tiding buai loin kawh zetin a volley nghal a, goal ropui a ni.

Substitute Mapuia'n chakna goal a khung miau avangin a hming ṭha a, amaherawhchu minute 90 chhung hian Aizawl FC player an khel ṭha tlang hle. Goal hmaa hriam tawk lo Ansumana Kromah pawh ṭum dang aiin a hmuhnawm a, a goal khung pahnih erawh offside vangin pawm a ni lo ve ve thung.

Inkhelah thil thleng liantham a awm lo chungin minute ruk zet hun pek belh a ni a, Kolkata club-in an siphurh an sut thei chuang lo.

Theihna a awm

Aizawl FC coach Gift Raikhan chuan, "Player naupang tak tak awm khawm kan ni a, thil thar kan zir zel a, chuvangin mipui nen pawh kan ṭan tlan a ngai. Social media-a sawiselna ringawt an thawndarh chuan team tan a ṭha lo a, chuvangin kan infuih phur tlan a ngai. Kan ṭan tlan chuan East Bengal pawh kan hneh thei a, he team-ah hian theihna a awm a ni," tiin Vanglaini a hrilh.

I League best coach ni lai Gift hian Kolkata club an hmachhawn hma aṭangin an harh thar tur thu a sawi lawk a, a thusawi dikna tilang turin khelmualah hnehna an chang. North East aṭanga I League nomawi la chawi awmchhun Aizawl FC hian match ruk aṭangin vawi khat chiah hnehna la chang mah se hriat tel tur chu MPL nen an khelh kawp avangin kar khatah match thum te an nei ṭhin a, East Bengal an hmachhawn hmaa ni li an awl meuh chuan Mizo club hian an elpui dangte hi an elpha tih a lang.