Real Madrid an tlawm leh tawh!

Santiago Solari-a'n Real Madrid coach hna a ngheta a chelh hnua an match hmasa berah an chak lo nghal - awlsam taka an hneh tura ngaih Eibar lakah 3-0 ngawtin an tlawm!

Real hian hnehna chang se chuan he thu buatsaih a nih thlenga hmahruaitu Barcelona nena an inthlauhna chu point hnih chauh ni thei tur a ni a, champion beisei ngam leh tura ngaih team kha tunah chuan parukna an ni rih!

Barcelona hian Real Madrid tlawm hnuah Atletico Madrid chu khualmualah an lenchilh a, 1-1 a an inhnehtawk avangin La Liga-ah fal takin hma an la hruai hleithei bik lo.

Atletico Madrid hian point khat chuahin Barcelona hi an thlau tawh a, nizan khan Sevilla chuan Real Valladolid an hmachhawn a, he thu buatsaih a nih lai hian result kan hre hman lo - hnehna an chang a nih chuan hma an hruai ang.

Real an mualpho

Manager lailawk Santiago Solari-a'n match li ngawt a zawna Real Madrid hnehna a chanpui avangin a nghet atan coach-ah lak a ni a, a lawmthu sawina erawh 0-3 a khualmuala mualpho a ni!

Eibar tan Gonzalo Escalante chuan minute 16-na lekah goal hmahruai khungin Real a barakhaih a, European champion chhaih thinrimna tur goal mai nia ngaih ni mah se Real an tho leh tawh lo.

Second half ṭan aṭanga rei lo teah Sergi Enrich chuan Eibar goal hnihna a khung a, Kike chuan minute 57-naah a chhunzawm ve leh bawk - Real-in a chhanletna tur goal an nei lo a, Eibar khelmualah an mualpho.

Eibar an chungnung

Real Madrid tan Karim Benzema chuan hnai set sawt aṭangin pet luhna remchang nei mah se a shot neih chu goal line aṭangin Eibar defender Cote chuan a lo pet chhuak hman a, Gareth Bale goal khung chu offside avangin pawm a ni lo bawk.

Mahse, minute 90 chhung inkhel thlir a nih chuan Eibar tlarhnung lamin hna an nei meuh lo a, Real hian goal thum aia tam an chhuah lo chu an vannei tia sawi theih a ni hial zawk - Real keeper Thibaut Courtois chu cheṭha bera chhal ngam a ni!

Belgian goalkeeper hian Brazilian substitute Charles goal khung ngei tur nia ngaih chu a dang a, Fabian Orellana hun neih ṭha tak chu Chelsea keeper hian a dan sak bawk.

Barca chhantu Dembele

Atletico Madrid tan league match 18 hnua a goal khung vawi khatna ni turin Diego Costa chuan minute 77-naah goal hmahruai a khung a, Barca tlanpelin league hmahruaitu an ni ngei dawnin a lang.

Mahse hun tawp nan minute khat chiah a awm tawh tihah Lionel Messi-a'n Ous­mane Dembele a zawng hmu a, tun hnaia Liverpool nena sawi­zawm hlawh forward hian Jan Oblak dan hman lohin si phurh sut nan a khung.

Team pahnih tan goal dang khung leh turin hun a awm tawh lo a, La Liga inkhel zinga ngaihven hlawh ber pawlah chak zawk awm loin team pahnih an inṭhen.