CR7 leh Mario bawk

Cristiano Ronaldo leh Mario Mandzukic te goal hmangin Juventus chuan an mikhual SPAL 2-0 in an hneh a, Italian champion hian Serie A season kal laiah hneh loh la tawng loin hmahruaitu an ni mek.

Portuguese forward Ronaldo-a'n Miralem Pjanic-a free kick pet aṭanga ball rawn kal chu minute 28-naah a khung a, a club thar tana a goal 10-na chiah a ni. Douglas Costa-a'n goal ban a tih per bakah Ronaldo bawkin goal ruak a khung ṭhelh. Goalkeeper Alfred Gomis chuan Costa pet dang mah se a per dawngtu Mandzukic-a'n chak nemnghehna a khung a, goal hnihna luh theih nan hian Ronaldo a ṭangkai hle.

International break neih hma khan Juve hian an league match hnuhnung berah AC Milan an hneh a, hemi ṭum hian Ronaldo leh Mandzukic ten goal an khung; ram tana feh chhuak lo pahnih bawkin international match khelh zawh a nih hnuah Turin club tan goal an khung zui a ni.

Massimiliano Allegri-a'n hun tawp dawnah Alex Sandro lachhuakin Giorgio Chiellini a dah lut. Italian defender hian Bianconeri tan match 483 a khelhna chiah a ni a, record inṭawm a neih pui Roberto Bettega khumin Juventus tana inlan hnem lamah pangana a ni phak ta chiah.

Juve hian tun hnai season sarih chhung chu Serie A nomawi an chawi thei a, kuminah pawh champion leh tura rinkai an ni. An hnuaia awm Napoli aiin match khatin an khel hnem a, point 37 hmuin an inkarah point kua zet a awm tawh.