Chhinga Veng chak mah se final la lut lo
Mc Dowell's No. 1 Soda Mizoram Premier League Season 7-ah champion lai Chhinga Veng chuan Chanmari FC chu semifinal first leg-ah 1-0 in an hneh a, minute 90 dang khelh tur a la awm avangin final khel tur a la chiang lo. November 29, Ningani zanah semifinal second leg khelh leh tur a ni dawn a, final khel tur zawnna a nih dawn avangin inkhel hmuhnawm zawkin tualchhung football ngainatute a la hmuak tihna a ni.
Inrinni zanah Chhingcows foward MS Dawngliana'n penalty aṭangin goal awmchhun a khung a, Chanmari substitute Jeremy Laldinpuia chuan injury time-ah Gatch Arthure Diomande goal khung tur titluin hnawhchhuah a ni a. Chawngthansanga hoten second leg-ah Jeremy chhawr thei dawn lo mah se Hnahthial rawlthar hian goal khat a chhanhim avangin Chanmari-in final beiseina an la neih phahah a ngaih theih ang.
Starting eleven barakhaih
Chanmari FC-in goalkeeper-ah Lalruatpuia an hmang a, College Veng tlangval hi tawnhriat nei ṭha tak ni mah se MS Dawngliana a dam reng chunga Chawngthansanga hnuaia a vawi khat nan semifinal-a a inlan hi a mak hle. Chanmarians starting eleven erawh rin lawk ang zel niin tlarhnungah tawnhriat nei ṭha vek C. Lalrosanga, R. Lalawmpuia, Lalmuanawma leh Immanuel HS Lalṭhazuala te an awm a. Midfield-ah Rochhingpuia a inhliam avangin Lalnuntluanga leh KC Larchhuakmawia te thlawp turin Ṭhasiama hman a ni a, mual sirah Lalmuanzova leh Laldampuia te awmin MC Malsawmzuala chu hmatawngah a awm.
Chhinga Veng midfielder pawimawh Lalrinchhana chu training-naah a inhliam avangin squad-ah a awm lo a, dam chiang lo Jacob Lalrawngbawla leh Lalremruata te awltir ngam turin coach Lalsangzuala Hmar a inringtawk bawk. Tlarhnungah right back pangngai hmang loin Vanlalzuidika chu a sir lamah a dah a, Lalthlahlova leh PC Laldinpuia chu defence laiah dingin vei lamah Hmingthanmawia a awm.
Goalkeeper chu Zothanmawia a ni a, midfield pathum chu Lalmuansanga, Lalromawia leh Gatch te an ni a, Lalrammawia chu hma tawngah awmin Dawngtea leh Lalsawmzela ten mual sir aṭangin an nawr. Rammawia hi position tinah a hman theih a, Chanmari nena hma tawng bera awm hi Aizawl FC nen chuan tlarhnungah a awm.
A nung tawk lo
Chhinga Vengin 'risk' an la tih first half-ah a lang a, position thum vela an chhawr ṭhan loh an hman avangin bul an ṭan ṭha lo. Chanmari FC pawh a danglam bik lo a, an goal bawh a na tawk lo.
First half-a Chhingcows chance ṭha ber chu Chanmari defender C. Muana tihsual aṭanga kal a ni a, Dawngtea'n la lutin a cross ball chu Sawmzela'n volley mah se an dang hman. Hun chanve hma lamah goal zawnah ball an pet lo ve ve a, C. Muana handball vanga Chhingcows penalty beiseina erawh mahni invennaah ngaiin referee-in penalty a pe lo.
Sanga hote an danglam
Half time chawlhah Chhinga Veng an infuih ṭha a, goal nawr nat theih nan F. Lalnuntluanga rawn luhtir nghal bawkin inkhel a danglam. Chhingcows goal nawr a na takzet a, Romawia ball pet chu goalline aṭangin defender Mapuia'n a dang hman. Hemi hnu hian Chanmari an insiamṭha thei chuang lo a, ball-in goal venhim tum C. Muana kut vawi hnih a per avangin referee tan thutlukna siam a harsa lo. Minute 55-naah Dawngtea rawn pen chhuakin keeper bumin a pet goal.
Chhingcows an che ṭha chhunzawm a, Chanmari defender tan Gatch-a tlan chakna chu mangchhia a tling. Hun tawp hma chiahin Gatch hian chak taka lalutin Chanmari substitute Jeremy chuan box pawn chiahah titluin freekick a chawi a, Romawia'n a hmang ṭangkai lo. Chawnga hote an vannei a, goal dang an chhuah belh tawh lo a, chutihrualin final thleng tur chuan first leg-ah goal zawna an pet loh avangin tlarhma lamah insiamṭhatna tur a tam hle.
Lawm a kim lo
Chhinga Veng coach Lalsangzuala Hmar chuan, "First half bik kha tun season-a kan khelh chhiat ber ṭum a ni a, kan khelh danah khan lawmna tur pakhatmah a awm lo. Halftime-ah pawh kan inhau nasa a, kan khelh dan hmang siam ṭhain second half-a kan khelh danah erawh ka lawm. First leg-a hnehna chan hi a pawimawh a, goal hnih tala kan chak lo erawh pawi ka ti hle," tiin Vanglaini a hrilh.
Chanmari coach Chawng-thansanga chuan, "Coach chuan training-naah midang hmuh loh kan hmu a, chuvangin starting eleven zawng zawng hi sawifiah vek theih a ni lo. First leg bikah chuan second half-a goal kan chhuah hma kha a pawi a, siphurh sut tuma kan khelh dan hmang kan tih danglam dan kha a fuh tawk lo. Minute 90 chhung hun kan la nei a, final luh ngei turin kan hun neih hi hman ṭangkai kan tum ang," tiin final beiseina an la neih thu a sawi.