Sarri enkawl Chelsea an tlawm ta
Chelsea chu an manager thar Maurizio Sarri kaihhruaina hnuaia a vawi khat nan Premier League-ah an tlawm ta. Blues laka 3-1 a hnehna changtu Tottenham Hotspur manager Mauricio Pochettino chuan club lian dangte elphak an nih zia a sawi.
Inrinni zan Wembley Stadium-a inkhelah Spurs lamin Dele Alli, Harry Kane leh Son Heung-min te hmangin goal an khung a, si thum faiin hnehna an chang dawn nia a lan hnuah Blues tan substitute Olivier Giroud-a'n goal khat a khung ve bawk.
Inkhel dangah Manchester United chu an mikhual Crystal Palace nen goal awm loin an inhnehtawk. United manager Jose Mourinho chuan, "Hnehna chang tur chuan rilru leh thinlung zawng zawnga khelh a ngai," tiin a naute chu inkhelha 100% rilru pe tawk loah a ngai.
Fiahna chu
Tottenham tan goal hnih khung turin minute 16 bak nghah thlen a ngai lo, midfielder Christian Eriksen-a freekick pet chu Alli-a'n a tauh lut nghal a, striker Kane chuan thui deuh tak ball a tlan hnuah hla tak aṭangin a pet thut a, keeper manto Kepa Arrizabalaga a che hman lo.
South Korea international Son-a'n Eriksen thawhrah sengin goal thumna khung teuh hle mah se Kepa a paltlang zo lo, chawlhlawk hnuah erawh Son hian chak zetin box chhungah ball tlan luh puiin Jorginho a tlan pelh hnuah David Luiz paltlang lehin goal ṭha zet a khung.
Spurs manager Pochettino chuan, "Ka tan thusawi tam a ngai lo, ka hlim em em a ni. Kan khelh dan pawh sawi ngai a awm lem lo, kei leh coaching staff chu hetiang team kan din theih avang hian kan lawm, ngelnghet takin ṭha taka khelh reng theih hi kan tum ber a ni," tiin a sawi.
Chelsea an hneh theih avangin Tottenham hian point 30 hmuin pathumna an ni a, an chungah hian hneh loh nei loa kaltluang Manchester City leh Liverpool te chiah an awm, an champion lo a nih pawhin a sang pali zinga tel turin theihna an nei.
Blues an tlawm
Antonio Conte enkawl Chelsea kha season hmasa khan Premier League-ah pangana an ni a, manager thar Sarri a rawn lan hnuah erawh champion tura rinkai an ni phak, chutihrualin an chunga awmte an chetsual duh miau loh avangin an dinhmun hi ṭha tak a ni bik lo.
Blues hi an kaltluang viau a, mahse tlarhma lamah player malkhaia innghahna tham an neih rih loh avangin chelh theih an ni. Striker Alvaro Morata-a'n Spurs goal zawnah a pet miah lo a, Blegium international Eden Hazard-a'n season kal laiah goal sarih bakah assist ṭum li nei tawh mah se a ṭum fuh loh ni chuan amah chhawm nung tur an awm lo bawk.
Italian manager Sarri chuan, "Kan khelh chhiat avangin ka kawm lo, a nihna takah chuan kan taksa, rilru, theihna leh ruahmanna kha a fuh lo vel vek. Harsatna ṭhenkhat a awm tih chu ka hria, chutihrualin chhuanlam siam hi awmzia a awm lo. Kan match hnuhnung pali vel kan thlir kir a nih chuan inkhel bul kan ṭan fuh lo tlangpui a ni," tiin a sawi.
Chelsea hian Ningani zanah Europa League group match khel turin PAOK Salonika an mikhual dawn a, hnehna changtu Tottenham pawh Nilaini zanah Inter Milan nen Champions League an khel thung dawn a ni.