Tuikual lakah Khatla TBL an tlawm
Tuikual South Basket-ball Club manager Lalremsiama Hrahsel chuan Mizoram Super League semifinal game 1 an khelh hma khan, "Basket kan venghim ṭha a nih chuan Khatla TBL kan hneh thei ang," tiin Vanglaini a hrilh a, a sawi sual lo.
Zirtawpni zan Hawla Indoor Stadium, Republic Vengthlanga inkhelah Tuikual South hian MSL vawi hnih champion tawh Khatla TBL chu 82-76 in an hneh. November 30, Zirtawpni zan hian game 2 khelh a ni dawn a, Phengphehlep hian hnehna an chang nawn a nih chuan an tlang tawh dawn.
TKS an hmuhnawm
Chak duh, in cho leh inhlau lo inkhel an in bawk a; a tir aṭangin boruak a nung nghal. Tihsual nei hlek an inhrem tawn thei zel a, quarter hnihna zawh nan second hnih pawh a awm tling tawh lo tihah Eddie Zothanpuia chuan hla deuh tak aṭanga 3-points vawm lutin - chawlhlawk laiin TKS hian 46-41 in hma an hruai.
Shakshan Rai-a'n hna
ṭul dang vangin haw san rih mah se, Desmond Antwine Medder a awm avangin Tuikual lam tan buaina tur a awm lo. Desmond hian point 37 a score bakah rebounds vawi 18 a la bawk a, steal vawi nga a neih bawk chu 'player of the night' a thlan a ni.
TKS captain F. Zodin-thara chu court chhunga hruaitu nih tling a ni a, hun harsa anga sawi ṭhin quarter thumna an khelh lai pawhin Phengphehlep hian point 15 ngawtin hma an hruai fal thei a. Tualchhung player zingah point 16 neitu Lalnunpuia Renthlei a hmuhnawm bakah, player parukna 'fans' puihna an dawng ṭha hle bawk.
TBL an tlawm
MSL an khelh tawh ṭhina Khatla TBL hian bul ṭan fuh lo mah se a tawp lamah an khingpui an pawtthla leh mai ṭhin. Quarter hnuhnung ber an khelh dawnah point 15 zetin an hniam hman a, amaherawhchu Moses Zoremmawia thawh rah vangin a zawna point nga an rawn neih nghal ṭhawt avangin beiseina an nei thar leh.
H. Laldinsanga (Mapuia) chuan a thluak fim tak hmangin thawh chhuah dan tur ngaihtuah mah se, point 27 neitu Veron Young chuan ma-mawh chhanna a nei kim lo. Young-a bakah Vanchuangpuia'n a club hlui laka point 15 a neih chuan thawhchhuah nan a tawk zo lo a ni.
Tualchhung basketball inelna sanga vawi hnih champion tawh hian final luh an duh a nih chuan game 2-ah an chetsual a thiang dawn lo a, game 1 minute sarihna leka kerek hliam Vanlalnunsanga a dam hman a nih chuan beiseina an la nei thei ang.