Chelsea lei duhtu an pung zel

Premier League club Chelsea-in neitu thar a nei ngei dawn niin a lang a, lei duhtu an pung zel - investment firm lar tak Centricus chuan Blues lei an duh thu an sawi ve leh ta.

Centricus company hlut zawng hi pound tluklehdingawn 29 a ni a, Centricus co-founder Nizar Al-Bassam leh chief executive Garth Ritchie te chuan Blues lei dilna hi an thlen a, an pawlah hian Jonathan Lourie (Cheyne Capital) leh Bob Finch (Talis Capital) te pawh an tel.

Chelsea fan ruhkawl Nick Candy chu a club ṭan lei tum zingah a tel a, South Korea lam aṭanga puitu thar a neih avangin Thawhṭanni khan Blues lei tura a ngamna zat hi a tipung leh tawh!

Centricus beiseina
London-a hmunpui nei Centricus chuan, "Chelsea-in hlawhtlinna an chan chhunzawm zel theih nan theihtawp kan chhuah chhunzawm ang," an ti a, sumdawnna leh infiamna huanga Chelsea hmachhawp awm mekte chu an chhunzawm tur thu an sawi bawk.

Centricus-in sum an ngah a, chumi piah lama Blues tana thu hriat nuam tur chu, an club lei tumtu company-in London-a hmun pui an nei tel kher hi a ni a, Chelsea season ticket neitu an ni hlawm bawk - Blues ṭantu an ni sa tihna a ni.

Chelsea lei duhtu an pung zel a, London club hralh chungchang buaipuitu Raine Group chuan Blues lei duhtute hi tun kar chhungin an thlifim leh ang a, tun thla tawp hmain Chelsea hi hralh fel hman an inbeisei.

Hello Candy
Chelsea fan Candy-a'n thawm a nei ring ber em ni chu aw, tih mai tur a ni a, ani hi Chelsea striker hlui leh Tifosy company neitu zinga mi Gianluca Vialli, South Korea company Hana Financial Group leh London-a hmunpui nei C&P Sports Group ten an thawhpui.

Naupan tet aṭanga Chelsea ṭantu Candy hian pound tluklehdingawn hniha lei a dilna chu a tipung leh tawh a, Raine Group hnenah London club lei turin pawisa an ngah tawk, tih lantirna an thawn tawh.

US mi hausa Ricketts chhungkua hming pawh a ri ring viau a, Swiss billionaire Hansjorg Wyss leh Los Angeles Dodgers neitu zinga mi Todd Boehly te pawh an hming an la lam reng.

Terry leh a pawlte
Chelsea fans tan John Terry hlutzia inhrilh nawn a ngai lo - English defender hlui hi Chelsea lei duhtu zingah a tel a, anni lei duh dan erawh Blues-a 10% share chan a ni a, a tam lo.

Terry leh a pawlte hi The True Blues tih an ni a, Oakvale Capital kaihhruainain Chelsea Supporters Trust, Chelsea Pitch Owners leh Chelsea hmeichhe team full back hlui Claire Rafferty tre nen an ṭang ho.

John Terry chuan, "Chelsea hian kum 22 zet chu ka nunah hmun pawimawh an chang a, keimahni ang thoa khawvela club ṭha ber din duhte nen hun thar kan tawn chhoh dawn avangin Chelsea sulhnu leh kalphung hi vawn nun zel ka duh a ni," tiin a sawi.

Chelsea lei tum langsar
• Liverpool chairman hlui Sir Martin Broughton leh a thawhpuite, an zingah hian London 2012 Olympic Games hotupa Lord Coe a tel.
• Major League Baseball team Chicago Cubs neitu Ricketts chhungkua pawh an tel a, anni pawh hi thawhpui nei tur tho an ni.
• Swiss billionaire Hansjorg Wyss leh US mi Todd Boehly te chuan Chelsea lei tum hian pawl an din a, American PR executive Barbara Charone, British sumdawng Jonathan Goldstein leh British journalist Daniel Finkelstein te chu an pawlah hian an tel.
• London-a hmunpui nei, investment firm Aethel Partners chu lei duhtu zingah an tel a, anni hi an hotupa chu Portuguese entrepreneur Ricardo Silva a ni.
• British multi-millionaire Nick Candy a langsar a, ani hi Chelsea striker hlui leh Tifosy company neitu zinga mi Gianluca Vialli, South Korea company Hana Financial Group leh London-a hmunpui nei C&P Sports Group ten an thawhpui.
• NBA team Philadelphia 76ers neitu Josh Harris hming a ri a, ani hian Crystal Palace-ah pawh share a nei.
• American football club New York Jets neitu Woody Johnson leh Saudi Arabia lama inkulh sumdawng intelkhawm pawh sawi rik an ni.