Final khel tur Chhinga Veng

Mahuma Memorial 1st Division Screening Tournament-ah, Chhinga Veng chuan Zarkawt Lords chu run 33-a hnehin final an lut. Vawiin hian league round khelh zawh a ni dawn, Ramhlun Venglai leh Kulikawn inkhela chak zawkin final-ah 3C hi an hmachhawn ang.

Nimin Suaka Cricket Stadium, Sihhmuia inkhelah Chhinga Veng hi ṭhum vawra vannei zawk an ni a, vuak hmasak an thlang. Over 43.3 chhungin run 191 an siam, target sang pangngai tawk tak a ni.

Zarkawt Lords lamin an um thei viau, mahse run 158 bak an tlin lo. Chhinga Veng tan Lalhruaimawia leh Vanlalruata Khawlhring ten wicket thum ve ve an la a, Lords kal sang zel tur an chhu chat.

Thawhṭannni inkhelah Gorkha chuan Hunthar chu run 25-in an hneh. Gorkha lamin over 38 chhunga run 135 an siam chu Hunthar lamin an umphak thei lo, over 42.1 chhungin run 110 bak an tlin lo a ni.

Inelna neih laiah Hunthar leh Gorkha hian match sarih khelh aṭangin vawi hnih ve ve hnehna an chang tawh. Net run rate nei ṭha zawk Gorkha hi parukna niin, an hnuaiah Hunthar leh chak ni hmel la hmu lo Lgends te an awm.

Team pariat hi vawi khat ṭheuh an inkhel kual a, a sang pahnihin final an khel dawn. A hmawr bawkna hi March 29, Thawhlehniah neih tur a ni dawn.