Pepe a inkhel thei dawn lo

Portugal tan thu lawmawm lo a awm. Defender pawimawh Pepe chuan Covid-19 a kai a, tun kartawpa Turkey nen Qatar World Cup playoff an khelh turah a inlan thei dawn lo a ni.

Portuguese Football Federation chuan Pepe chungchang hi an sawi chiang tawh, a hmun ruak luah khat turin Lille defender Tiago Djalo chu koh a ni thung, tuna a lan dan chuan Portgual hian tlarhnung laiah an rinrawl pahnih an chhawr thei dawn lo.

Manchester City defender Ruben Dias chu hliam vangin a chawl mek. Hrem vangin Joao Cancelo a inlan thei dawn lo bawk; tlarhnungah an rinrawl pathum - Pepe, Dias leh Cancelo te an inlan thei dawn lo tihna a ni.

Defender pathum bakah hian midfielder Rúben Neves pawh hliam vangin a inlan thei dawn lo. An inkhelhna tur hi Porto a nih avangin mahni muala khel tur an ni a, player ṭhenkhat inlan thei lo mah se beisei an la nei ngam ang.

Portugal tan Turkey hneh ringawt a tawk dawn lo, an chak a nih pawhin Italy leh North Macedonia inkhela chak zawk an hmachhawn leh a ngai dawn. Qatar panna ticket nei turin match hautak pahnih paltlang a ngai tihna a ni.