Sutton-a'n Lampard a sel

Premier League nomawi chawi tawh striker Chris Sutton chuan Everton manager Frank Lampard chu a thusawi avanga a inchhir a rin thu a sawi. Chelsea manager hlui Lampard hian FA Cup-a Crystal Palace 4-0 ngawta an chak loh zawhah a player rilru put hmang a sawisel.

Toffees manager Lampard chuan, "FA Cup quarterfinal a ni a, kan chak a nih chuan Wembley Stadium kan thleng dawn. Kan khel chhe hran lo a, Palace pawh an khel ṭha bik a ni lo. 4-0 a kan chak loh chhan chu inrintawkna kan neih loh vang a ni. Tactic vang a ni lo. Inkhelh ṭantirh minute 20 chhung khan kan tactic chu pholan a ni a, Palace-in halfway line rawn pelh pawh an harsat," tiin an chak loh chhanah player-te a mawhpuh.

Blackburn champion pui tawhtu striker Sutton erawh Lampard thusawi hi a ṭawmpui lo. Sutton chuan, "A player-te a hmin theih loh thu a sawi a, chu chu ani hna a ni lo a mi? Dressing room boruak a dik lo a ni ngei ang. Player-te rilru put hmang an sawisel a nih chuan buaina a awm tihna a ni. Player-te a ngai sa a ni ber a, chutihrualin Premier League-a inham tang tur chuan tuna a sawisel player-te bawk hi a pawimawh dawn," tiin a sawi a, beisei a phak loh thu a sawi tel bawk.

Everton hian FA Cup quarterfinal-a Crystal Palace an hneh hma hian Newcastle United hneh mah se Lampard hnuaia an record hi a ṭha lo. Lampard hnuaiah Everton-in match 10 khel tawhin vawi li an chak a, vawi ruk chak loin goal 17 ngawt an chhuah. Lampard hi a club hlui Chelsea-ah a hlawhchham tawh a, Everton-ah pawh a insiamṭha thei rih lo a ni.