Qatar World Cup a fuh lo - Louis van Gaal

Netherlands coach Louis van Gaal chu Qatar World Cup sawiseltu langsar leh tharlam a ni. FIFA World Cup hi a vawi khat nan thlasik laiin khelh a ni dawn a, hei hian nghawng a neih nasat avangin sawiseltu pawh an lo tam tawh hle.

World Cup khelh hun sawn avang hian European league kalphung tih danglam a ngai dawn. Inelna thlengtu Qatar hian stadium leh thil ṭul dang sakna kawngah mihring dikna chanvo an palzut nasa hle nia sawi a awm bawk.

Dutch coach Van Gaal chuan, "Qatar rama World Cup khelh tur hi sum leh a kaihhnawih thil vang chauh a ni, hei hi FIFA tan phat ngaihna a awm lo. Football hmasawn nan tiin an sawi, hei chu tih mai mai a ni," tiin football thuneitu sang thutlukna a sawisel.

Nikum khan Dutch team bakah Germany leh Norway te chuan Qatar rama mihring dikna chanvo a din chan theih nan hma an lo la tawh, thutlukna hi sawhsawn dawn lo mah se sawiseltu chu an la awm reng dawn niin a lang.

Qatar-in World Cup an thleng dawn tih an hriat hnu hian, ram dang aṭanga hnathawk zingah thi an tam. British chanchinbu lian Guardian-in a tarlan dan chuan hnathawk mi 6,500 chuangin an thih phah tawh a ni.