Medvedev tan number 1 nih leh theihna remchang

Danill Medvedev chuan mipa world number 1 dinhmun luah leh theihna remchang a nei dawn. Hmeichhe singles lamah Aryna Sabalenka pawhin tun hnai thla 10 chhunga a vawi khat nan final luh ngei a tum bawk ang.

Nilaini zan aṭangin Miami Open khelh a ni dawn. Mipa lamah Medvedev hi seeded pakhatna a ni a, hmeichhe huangah Sabalenka chu seeded sang ber a ni thung, an pahnih hian round hmasa berah chuan an 'bye' thei dawn a ni.

Kar hmasa khan Indian Wells an khel. Russian star Medvedev hian third round a paltlang zawh loh avangin Novak Djokovic lakah number 1 nihna a hum thei lo. Number 1 nihna nei let tur chuan Miami Open-ah hian semifinal a thlen phak a ngai dawn.

Serbian star Djokovic erawh inelna hmachhawn loin a awm mek. Covid-19 vaccine a lak duh loh avangin United States-ah a zin lut thei lo a, tournament a khel thei lo a ni, kuminah inelna pakhat chiah a la hmachhawn.

Kum 26 mi Medvedev tan semifinal thlen hi thil awlsam a ni lo mai thei, season hmasa pawh khan quarterfinal-ah Roberto Bautista Agut a ngam lo - kuminah erawh nikum ai chuan beisei a nei sang ang.

Indian Wells final-a chak lo Rafael Nadal erawh a inhnukdawk. Spanish star hian tun season a match hmasa 20 zetah hnehna a chang a, a match hnuhnung berah erawh a chak lo. Tunah chuan clay court season hmang turin a chawl hahdam rih dawn.

Hmeichhe lama seeded pakhatna Sabalenka hi tun kara ranking chhuak tharah khan pangana a ni. Nikum May thlaa khelh Madrid Open hnuah final luh a la nei lo, chuvangin a ranking pawh a hniam zawngin a kal mek.

Belarus nula hian hmasawn tumin thapui a thawh dawn. Poland nula Iga Swiatek chu seeded pahnihna a ni dawn a, ani hi Indian Wells champion hlim a nih bakah season duhawm hmang lai a nih avangin hmachhawn a awlsam dawn lo.

Anett Konteveit, Maria Sakkari leh Simona Halep te pawh an inlan dawn a, anni bakah hian tennis court pawn lama buaina nei zauh zauh Naomi Osaka pawh a tel dawn - hmeichhe inelna hi hmuhnawm tura ngaih a ni.