Mohammedan tan Joseph che ṭha zel

Mohammedan Sporting Club chuan Thawhṭanni zan khan Marcus Joseph goal hmangin Kenkre 1-0 in an hneh a, I League hmahruaitu an ni lehnghal. Kolkata club-te inkhelh hma hian Gokulam Kerala-in Trau 2-1 in an hneh a, Kerala club hian darkar thum chhung lek pakhatna dinhmun an hauh.

Mohammedan hian Kenkre an hmachhawn hma hian Churchill Brothers an hneh lo a, Naihati Stadium-a Kenkre an hmachhawn ṭumah erawh an chesual nawn lo. Kenkre hian season bul an ṭan ṭha bik lo a, point khat chauh la hlawh chhuak mah se Kolkata club lakah an tlarhnung a khawng hle.

Team ṭha zawk Mohammedan-in ṭan phat aṭangin goal khung tumin an nawr a, captain Nikola Stojanovic freekick chu keeper Padam Chettri-a'n a dang ṭha hle. Kenkre-in goal venhim chu hna pui berah an nei a, first half-ah goal hmuh tur a awm lo.

Second half-ah pawh keeper Chettri a langsar a, Mohammedan erawh goal hmaah an vannei tawk lo. Mizo tlangval Brandon VL Remdika pawhin Faisal Ali cross chu goal-ah a chantir thei lo. Minute 72-naah goal hmuh tur a awm a, Manoj Mohammad cross duhthusam chu Marcus Joseph-a'n a tauh goal.

Hun tawp lamah Kenre-in nawr chiam mah se inkhel result a danglam phah lo - Kolkata club 1-0 in an chak. Goal awmchhun khungtu Marcus Joseph hian season a hmang ṭha hle. Caribbean goal-machine hian nikum aṭangin Mohammedan hi zawm chauh mah se chhuanpui tham sulhnu a nei tawh.

Kum 30 mi Joseph hian Mohammedan hi nikum khan Durand Cup-ah a champion pui a, top scorer a ni. Calcutta Football League-ah nomawi a chawipui a, kum 40 hnua nomawi an chawi theih nan final-ah Railways 1-0 in an hneh a, goal awmchhun a khung.

Tun season I League-ah pawh Joseph hian match ruk lek aṭangin goal kua a khung der tawh a, Mohammedan-in hma an hruai theih phahna chhan a ni. Joseph hnaihtu ber chu Luka Majcen a ni a, Gokulam Kerala forward hian goal ruk a khung tawh. March 25, Zirtawpni zanah Mohammedan SC leh Gokulam Kerala te an inkhel dawn a, hmahruaitu inchuhna a ni ang.

I League-ah hian team 13 an awm a, round tinah team pakhat an awl zel. Vawi khat ṭheuh an inkhelh kual zawhah a sang pasarihin Championship stage an zawng ang a, a hniam parukin relegation stage an khel thung dawn a ni.