Bulls an chak leh ta
Tun hnaia an result ṭha lo vangin Chicago Bulls an buai a, nimin zing NBNA regular season inkhelah erawh Bulls an chak leh ta. Patrick Williams lo kirna inkhelah hian Toronto Raptors chu 113-99 in an hneh.
United Center-a inkhelah Bulls hian bul an ṭan fuh a, quarter hmasa berah 30-24 in hma an hruai nghal. DeMar DeRozan leh Zach LaVine ten point 26 ve ve an nei a, point 19 neitu Nikola Vucevic a chet ṭhat bawk avangin buaina lian an tawk lo.
Billy Donovan-a enkawl Chicago Bulls hian season kal laiah vawi 42 hnehna an chang tling ta chiah. Eastern Conference table-ah pangana an ni, chak lo Raptors hi pasarihna an ni thung - playoff khel phak zingah an la awm tihna a ni.
Nimin zing inkhel dangah Houston Rockets, Boston Celtics leh Dallas Mavericks te chuan an khingpui ṭheuh an hneh ve bawk.
Los Angeles Lakers pawhin Cleveland Cavaliers chu 131-120 in an hneh. LeBron James-a'n a team hlui Cleveland lakah point 38 a nei a, ani aia nei hnem an awm lo. Lakers hi tun hnai match ruk chhunga vawi hnih an chakna chauh a ni.
NBA Most Valuable Player vawi li ni tawh hian 2018 khan Cavs aṭangin Lakers hi a zawm. NBA champion a nihpui tawh lakah hian assist vawi 12 a neih bakah rebound vawi 11 a la bawk, a team hlui lakah zahngaihna a lantir lo.
Kum 37 mi James chuan, "Hnehna chan hi kan mamawh, kan mamawh takzet a ni. Kan nihna tak lan chhuah tir hi kan mawhphurhna a ni a, inrintawkna nen sang tak thleng turin kan bei ngam tur a ni," a ti.
Lakers hian kuminah vawi 31 chiah hnehna an la chang, vawi 41 zet an tlawm tawh. Western Conference table-ah pakuana an ni mek a, playoff khel phak tur chuan hmasawn an mamawh hle. An chunga awm Minnesota Timberwolves chu vawi 36 an chak tling tawh.
NBA - Nimin Results
Toronto Raptors 99 - 113 Chicago Bulls
Washington Wizards 97 - 115 Houston Rockets
Boston Celtics 132 - 123 Oklahoma City Thunder
Minnesota Timberwolves 108 - 110 Dallas Mavericks
New Orleans Pelicans 103 - 106 Charlotte Hornets
Los Angeles Lakers 131 - 120 Cleveland Cavaliers
Portland Trail Blazers 119 - 115 Detroit Pistons
Miami Heat 106 - 113 Philadelphia 76ers
Utah Jazz 106 - 114 Brooklyn Nets