Schick-a'n Sweden hmachhawn thei dawn lo

Europe aṭanga World Cup khel tur 10 a hriat tawh a, playoff hmangin pathum dang an la zawng dawn. Playoff semifinal hi March 24, Ningani zanah khelh a ni dawn a, ram langsar a tel avangin playoff boruak a hot dawn.

Euro 2020-a player langsar Czech Republic forward Patrik Schick chuan inhliam vangin Sweden a hmachhawn thei dawn lo. Kum 26 mi Schick hian ram tan match 33 khelin goal 17 a khung tawh a, Euro 2020-ah khan Cristiano Ronaldo nen goal nga ve ve khung mah se assist a neih tlem zawk avangin silver boot a dawng. Chutihrualin Scotland laka halfway line pelh hret aṭanga a goal khung erawh goal of the tournament-ah an thlang.

Schick hi kar liam taa Bayer Leverkusen-in Wolfsburg an hneh ṭum pawhin a inlan lo. Czech hian Schick bakah hliam vang thoin goalkeeper Jiri Pavlenka an chân bawk. Sweden-in Manchester United forward Anthony Elanga chu a vawi khat nan an ko a, Red Devils striker hlui Zlatan Ibrahimovic te nen an khel ho thei dawn tihna a ni.

World Cup Playoff
Path A
Semifinal - March 24, Ningani
Wales 1:15 AM Austria
Scotland PSTP Ukraine
Path B
Semifinal - March 24, Ningani
Russia* DISQ Poland
*DISQ - Russia hi an hrem avangin Poland-in final an lut.
Sweden 1:15 AM Czech Republic
Path C
Semifinal - March 24, Ningani
Portugal 1:15 AM Turkey
Italy 1:15 AM North Macedonia

Note
1. Path tin aṭangin team khat zelin World Cup an khel ang.
2. Semifinal leh final hi single lek a khelh tur a ni a, ranking sang zawk (inziak hmasa zawk) home-ah khelh tur a ni. Final khelhna tur hmun hi pawh leh tur a ni.
3. March 29, Thawhlehni zanah Playoff final hi khelh tur a ni.