Man City-in midfielder an zawng

Manchester City-in Fernandinho thlakna tur an zawng mek a, Brazilian midfielder hi season tawpah a contract a zo dawn. Pep Guardiola-a'n Fernandinho hi season khat dang cham leh turin a duh a, thutlukna erawh player kutah a awm.

Kum 36 mi Fernandinho hian kum 2013 khan Shakhtar Donetsk aṭangin Manchester City hi a zawm a, Etihad Stadium-ah hming a chher hle. Brazilian midfielder hian Premier League nomawi pali bakah FA Cup pakhat leh League Cup parukte a chawipui tawh.

Tun season-ah Fernandinho-a'n hmun pawimawh a chang pha tawh lo a, chutichung chuan league match 13 khelin goal khat a khung. Man City hian Rodri nei mah se tawnhriat nei ṭha player an chelh hi a pawimawh. Fernandinho hi defensive midfielder ṭha tak a ni a, tlarhnungah pawh chhawr theih a nih avangin a hlu lehzual.

Fernandinho-a'n season khat la khel dawn pawh ni se Man City tan player zawn a ṭul tawh hrim hrim. English club nena sawi zawm zingah AS Monaco midfielder kum 22 mi Aurelien Tchouameni chu a langsar a, chutihrualin Fernandinho thlak zawh erawh a harsa ang.