Beidawnna piah ramah Rinpuia ; I thiam lohna kan hmu lo, zalen i ni!
“Chhuah zalen i ni, tih ri ka hria a, chu chu Judge ka aṭanga ri a ni. Ka bengin ka hria a, mitin hmu bawk mah se ka awih thei lo. Dan hremi hnenah ka va zawt nawn kher a, 'a sawi zawh chiah kha, i zalen', min lo ti," tiin Lalrinpuia chuan Vanglaini a hrilh.
Mizo tlangval, table tennis a khelh thiam avanga Mizoram chauh ni lo India rama hriat hlawh, bumna avanga kum li, thla thum leh ni hnih zet Taloja Jail, Mumbai-a tang chu tun hnai khan thiam chantir a ni a, nun phung pangngai zawh leh turin hmalam pan a tum.
A ngaihna hre lo
South Africa-ah an inkhel a, Abu Dhabi lam aṭangin December thlatir lam khan India an rawn pan. Nghakhlel taka a thlir India ram leilung an rawn rap a, Mumbai Airport an thlen chuan man a tawk ta hlauh si!
Kum bithliah hrang hranga India champion ni kim thei Rinpuia chuan, "Airport kan rawn thleng a, ka chunga thil thleng kha mak ka tih em avangin engmah ka hrethiam lo. A nihna takah chuan engtianga pawi nge a nih tih leh a nghawng nat dan tur pawh ka hre lo.
"Ni hnih thum chhung vel kha chu a ngaihna hre loin ka awm, eng ang taka lungngaih tur nge pawh ka hre thiam lo," a ti. A ṭhianten bungrua an thawn zingah dan phal loh thil a awm nia puh a ni a, chumi nghawng tur chu a hrethiam lo tihna a ni.
Rinpuia hi India ram chhungah kum bithliah hrang hranga champion vek a ni satliah lo, number 1 a ni fai vek bawk. Senior huangah pawh kum naupangte ni chungin silver medal a la hman, mahse tum reng vang ni loin tan in thim a belh a ngai ta si.
Jail runah
Airport-ah hren lailawk a ni a, chumi hnuah tan inah khung nghal a ni. Khatih laia tleirawl mai la ni, mahni chi pui pawh awm lohna hmuna jail tan hrehawm dan tur chu chhut thiam pawh a harsa zawk hial ang.
Mizo TT player zinga thleng sang ber Rinpuia chuan, "Pathianin min veng, ka vanduaina karah pawh vanneihna a awm ve bawk. Jail tang ṭhenkhat khan chanchinbu an lo chhiar a, Times of India-in ka chanchin an ziah kha an lo chhiar fuh.
"A nihna takah chuan jail lut tirte chu tih duhdah tawk pawh an awm ṭhin, kei erawh chu a tir aṭangin ka tanpuiten min ti duhdah lo a, mutna pawh a hmun ṭha lai min pe," tiin a hun hmasa lam a sawi.
Jail a tan lai hian zing dar 6:30 velah an tho ṭhin a, chumi hnuah chuan TV en, zai ngaihthlak leh exercise lak te chu a hun hman dan tlangpui a ni a, kum li chuang zet hun a hman dan a nih avangin ngaiah a nei hman deuh hial.
Beidawnna
India ramah chuan thubuai ngaihtuah chhung a rei a, kum tam fe hnuah thutlukna siam a ni chauh ṭhin. Rinpuia hi bail tumin vawi nga hmalak a ni a, mahse an hnawlsak vek. Lu chu a hai duh ve map map khawp ang tih a chiang.
A beidawn teuh thu sawiin Rinpuia chuan, "Vawi nga zet an hnawl kha chuan ka beidawng teuh ṭhin hle, beiseina ka neih ve angte pawh kha thawk leh khatah an liam leh duak ni mai hian ka hre ṭhin.
"Ka theih anga exercise ka lak ṭhin chhan pawh kha, taksa sawizawi bakah rilru kal ding lutuk tur tih thawl nan a ni a, mahse bail theih ka nih loh chiah kha chuan ka taksa thlengin a tuar leh vek zel," a ti.
Bail dilna hi hnawlsak a ni zel a, thubuai pawh ngaihtuah nghal a ni mai lem lo. October 5, 2021 aṭang khan thubuai hi ngaihtuah ṭan a ni chauh, a nghaktu leh tuartu tan chuan a rei duh vang vang khawp ang.
Beiseina nung
Beidawn rum rum chang nei mah se Rinpuia hian engtik niah emaw chuan zalen hun a neih a beisei reng ṭhin. Rinpuia hi TT khelh vangin kum naupangte ni chungin vai rama khawsa tawh a ni a, a awmna hmunah ṭawngṭai a thlah ngai lo.
Hun harsa kara a ṭawngṭai dan sawiin Rinpuia chuan, "Jail tan hma kha chuan ni tin ka ṭawngṭai tho a, tan hnuah erawh ṭawngṭai tam a awl zual khawp mai. A hma chuan zing thawh, chawi ei leh mut dawn kha hunbi a ni deuh ṭhin.
"Mahse tan inah chuan hunbi pawh a awm thei lo, dikna a lan theh nan ni tin hian ka ṭawngṭai hnem," a ti. Jail chhungah hian Bible a chhiar theih a, a hun hman ṭhin dan zingah pawh Bible chhiar hi a tel.
Rinpuia chuan, "Ka nuin Bible min rawn pe a, ka chhiar chhuak dap. Philippi 4:13 hi ka innghahna a ni," a ti. "Mi ti chaktuah chuan engkim ka ti thei a ni," tih chu a nun hruaitu atan a hmang a, beiseina a neih chhan a ni bawk.
Zalenna
Mi zalen lote hian zalenna hlutzia chu an hria, tih a ni ṭhin. Zalen taka awmte tan chuan zalenna hlutzia hriatthiam a harsa deuh mai thei. Hripui leng vanga inkharkhip khan eng emaw chen chu min hrilhfiah.
Kum li chuang jail-ah a tan avangin, tan in chhunga awm kha ngaiah a nei hman deuh. Ni tin hun hman dan pawh Thawhṭanni aṭanga Pathianni thleng a inang put a, a kar leh, thla leh, leh kum tharah pawh a danglam tehchiam lo.
India ram table tennis huanga hmabak nei êng berte zinga mi ni ṭhin khan, engtikah nge world champion ka nih ang tih ai chuan engtikah ka zalen ang tih chu a ngaihtuahna luahtu a nih a ngai ta si, ngaihtuah chiang mah teh, a pawi asin.
Engkim tan hun ruat a ni tih ang khan, vanduaina tawk Rinpuia tan pawh zangkhua in bungbut hun a nei. Rinpuia leh MTTA tan chuan tan in aṭanga a chhuah ni - March 14, 2022 hi 'Zalenna Ni' tia hriatreng a ni tawh ang.
Hmathlir
Hun rei tak chhung a hun ṭha tih khawtlai ni mah se Rinpuia hi a beidawng lo. Tun hma lama a hming chher tawhna table tennis luhchilh leh ngei a tum a, chumi tur erawh chuan hmanhmawh thut thut theih a ni dawn lo.
Puia chuan, "Jail aṭanga ka chhuah tukah khan Mall-ah kan kal a, TT khelhna a lo awm. TT bat ka'n vuan leh chiah chu engkim mai kha ka hmu mawi vek ni berin ka hria, mumang pawh a ang rum rum. Ka rin ai takin ka lo la vaw thei bawk.
"Taksa ka sawizawi chho leh dawn a, ṭha taka inkhel leh tur chuan fitness a pawimawh. Taima takin ka beih a ngai dawn, hliam leh harsatna dang a thlen loh nan taksa tih fit chu ka tum hmasak tur a ni ang, zawimuangin ka practice bawk ang," a ti.
Naupan lai aṭanga a ṭhan hnan a nih avangin TT chu ṭha takin a khel leh thei ang tih a rinawm. Amaherawhchu, a lakah beisei dan chin tawk kan neih a ngai dawn, atan vawi leh khata ṭhat leh thut a harsa ang - ṭawngṭaipuina a la mamawh reng.
Rinpuia Puitu Group (RPG)
Puih a ngai a, a puih theih dan kawng langsar chu ukil rawihsak a ni. Ukil rawih nan pawisa a ngai hnem si, a nihna takah chuan Rinpuia leh a chhungte tan a luhai thlak takzet ang tih chu thil chiang a ni.
Mizoram Table Tennis Association chuan an fapa hi an thlahthlam lo. Kum 2020 bul lam khan MTTA chuan Mizoram mai bakah state pawn lama TT chhungkuate hnenah vehbur a khawnsak a, cheng nuai nga vel hmuh a ni.
Pawisa hi ukil rawih nan a la tawk zo lo. September, 2021 a lo her chhuah chuan zau zawka hma la turin Rinpuia Puitu Group (RPG) din a ni a, hetah hian infiamna lam mai bakah Mizo mi langsar tak tak an tel.
RPG hian kawng hrang hrangin hma a la, an thiam dan danin Mizo mipui hnenah Rinpuia tan pawisa an khawnsak a ni ber. Mahni ṭhenawmte chaw nghei hmu thei lo Mizoten Rinpuia puih hi kan lo hreh lo tlang tih pawh a lang.
Pawl leh mimal tam takin ṭanpuina pawisa hi an pe a, a tawpa a tlingkhawm chu cheng nuai 17 a tling hial! Ukil rawihna tur pawisa a awm a, ukil pawhin chak takin hma a la chhunzawm thei, a tawpah chuan zalenna chu sual chhuah a ni.
Case hautak chu...
Lalrinpuia hi Narcotic Control Bureau (NCB) in an man hian, section 8(C) of NDPS Act, 1985 hmangin dan bawhchhiaa puh a ni. Hremna pawh section 22(C), 23 & 28 hmanga lek theih turin an thlen. Dan hmanga hremna hi kum 10-20 chhung lung in tan leh, pawisa cheng nuai 1-2 inkar chawi theihna a ni.
December 13, 2017 khan Mumbai Airport-a hren a nih ṭan leh, a tuk December 14-a man (Judicial Custody) a nih tak aṭanga Supreme Court-in bail a rem tih lohna order a chhuah hun 2021 September 7 thleng khan, court-ah Rinpuia thubuai hi (trial) kalpui a la ni lo.
Hemi chhung erawh hian bail dilna hi vawi nga - session court-ah vawi hnih; Mumbai High Court-ah vawi hnih leh Supreme Court-ah vawi khat thehluh hman a ni a, mahse phalsak a ni lo vek. Supreme Court hian bail dilna a hnawlsak rualin NDPS Special Court chu Rinpuia case court hearing rang taka kalpui turin thu a pe tel thung.
Supreme Court order bawhzuiin NDPS Special Court, Mumbai chuan September 20, 2021 aṭang khan thubuai (charge frame-na) chu a ngaihtuah ṭan. October 5, 2021 -ah ko lehin, heta ṭang hian chak taka court hearing kalpui chhoh a ni.
February 25, 2022 khan trial hnuhnung ber chu neih a ni. Judgement order chu March 14, 2022 khan tihchhuah a lo ni ta a ni. Rinpuia ukil Taraq Sayyed chuan case hi uluk taka a zir hnuah, chinfel nana a kalkawng tawi theih dan tur awm theite a dap hnuin, ruahmanna a nei a, ṭha a tih angin a kalpui thei ta bawk.
NCB in ruihhlo leh a awmna bag neitu nia Rinpuia an puhna te, ram pawn aṭang India rama ruihhlo la luttu nia an puhnate chu Special Court chuan a puhtu NCB-te chu finfiahna ṭha tawk an neih loh avangin Rinpuia hi hrem a nihna tur a hre lo.
Thutlukna-ah hian a puhtu NCB lam hi an lungawi loh chuan, court-a zualko leh thei an la ni tho thung.
Thu pawimawh pali
1)Rinpuia leh midang tunge an nih hriat leh hriat lohte nena, a hnen aṭanga contraband (dan phal loh) thil man anga puhnaah hian, conscious possession a nei em, puh a nihna ang hian section 8 (C) r/w 22(C) hmangin hremna pek tur a ni em, a mantute hian an finfiah thei em?
Chhanna - Thei lo
2) Rinpuia man a nihna hmun leh thil thlen hun tarlan ang hian, Psychotropic Substances hi ram pawn aṭanga India rama lakluh tum/thil sual tih tuma puhna hi Section 8 (C) r/w 23 & 28 ND& PS Act anga hremna a chunga lek turin a mantute hian an finfiah thei em?
Chhanna - Thei lo
3) A mantute hian an puhna zawng zawng emaw, eng emaw berah hian an puhna ang tak hian a chunga hremna lek turin an finfiah zo em?
Chhanna - Thei lo
4) Eng Order/Judgment nge?
Chhanna - An puha hi thiam chantir a ni.
Engkimah a lawm
Lalrinpuia chuan hun thim a tawh laiin puitu leh thlahthlam lotu a ngah thu a sawi a, a tana hma latu leh ṭanpuina petu zawng zawng chu mimala sawi vek sen pawh a nih loh thu a sawi hial.
Mizo tlangval chuan, "Mizoram Table Tennis Associaton hian kawng engkimah min pui, anni hmalakna hian mi hrang hrang an rawn che chhuak bawk. Min pui tura group hial an siamte kha ropui tak a ni, ka tan chuan a hlu takzet.
"Jail aṭanga ka rawn chhuah khan nun a inthlak hlawk a, engkim mai kha a danglam. Mumbai Mizo ten min thlahthlam ngai lo, a hmunah Rev. PC Nghaklianmawia, H. Lalruatliana leh Mawia ten min rawn hruai a, anni hian a hnuah pawh min kaihruai," a ti.
Rinpuia hian Mizo mipui chungah lawmthu a sawi a, pawisa petu mai bakah bang loa ṭawngṭai puitute vanga chhuak thei a nihna a hre reng.
