FIFA World Cup Playoff ; Portugal leh Italy fiahin an awm dawn ta

Khawvela inelna ngaihhlut ber FIFA World Cup chu kumin kum tawp hian Qatar-ah khelh a ni dawn. Ram 32 inlan tur aṭangin ram 15 an tling tawh a, hmunruak 17 la awm.

Europe-ah ram 10 an tling tawh. Hmunruak pathum hi ram 12-in an inchuh dawn a, Russia erawh Ukraine an run avangin hrem an ni a, playoff an khel ve thei dawn lo.

Playoff kalphung
UEFA hnuaiah ram 55 an awm a, Europe hian quota 13 an nei. Qualifying round-ah ram 55 hi group 10-ah ṭhendarh an ni a, group hmahruaitu ṭheuh an tling.

Group tina pahnihna hian playoff an khel a, heng team 10 bakah hian Nations League Playoff-a che ṭha pahnih Austria leh Czech Republic nen 12 chiah an ni.

Team 12 te hi group thumah pali zelin ṭhendarh an ni a, group tinah hian semifinal leh final khelh a ni dawn. Group tin champion hi Qatar-ah an zin thei ang. Semifinal hi seeded team ho khelmualah zel khelh tur a ni a, final erawh ṭhumvawr ṭhat tur a ni thung ang.

Champion ve si!
Europe aṭanga tling tawh team 10-te chu Belgium, Croatia, Denmark, England, France, Germany, Netherlands, Serbia, Spain leh Switzerland te an ni.

Heng team 10-ah hian European champion Italy leh Euro 2016 champion Portugal te an tel lo. Inelna hnuhnung pahniha champion Italy leh Portugal-te hi playoff khel tur zingah an tel a, group khatah an awm zawk avangin pakhat zawk an tla dawn.

Portugal an tling zo lo a nih chuan Cristiano Ronaldo-a'n World Cup a khel dawn lo tihna a ni a, Manchester United forward bakah hian player ṭha rual an la kawl. Italy pawh vawi li ngawt champion tawh an ni a, Roberto Mancini hote hi inlan lo tur atan chuan an uiawm hle.

Path C
Portugal leh Italy awmna hi path C a ni a, team pahnih hi seeded an nih ve ve avangin semifinal-ah an inhmachhawn nghal dawn lo. Portugal hian zanin dar 1:15 hian Estadio do Dragao-ah Turkey an mikhual ang a, Italy-in Stadio Renzo Barbera, Palermo-ah North Macedonia an mikhual ve thung dawn.

Portugal hi Turkey lakah rinkai ni mah se German coach Stefan Kuntz hnuaiah Crescent Stars hian hneh loh an la tawng lo. Chutihrualin Euro 96 champion team zinga mi Kuntz-a hian nikum September thla aṭangin team a enkawl ṭan chauh a, match li chauh an la khel.

Italy pawhin North Macedonia theihna chu an hrechiang khawp ang. Azzurri hi kum 1958 hnua a vawi khat nan World Cup 2018 khan an inlan lo. Italy hi Turin-ah Macedonia nen 1-1 in an inhnehtawk a, World Cup an khelh lohna chhanah Macedonia an tel tihna a ni.

Portugal an buai
Fernando Santos-a'n Manchester City defender pahnih Ruben Dias (inhliam) leh Joao Cancelo (hrem) te a chhawr thei dawn lo a, Covid-19 kai vangin veteran defender Pepe a khel thei dawn lo bawk.

Tlarhnunga player pathum ngawt inlan thei lo hi buaina tham a tling. Midfield-ah pawh Portugal-in buaina an tawk. Wolves midfielder Ruben Neves a inhliam a, hrem vangin Renato Sanchez a khel thei dawn lo. Chutihrualin Bayern Munich defender hlui Sanchez hi a inhliam hrim hrim.

Fernando Santos-a'n buaina nei mah se chhuanlam neih erawh a thiang lo. Portugal hian tlarhmaah Ronaldo, Diogo Jota leh Bernardo Silva te an chhawr thei a, chakpui tham vek an ni. Midfield-ah Bruno Fernandes, Joao Moutinho leh Danilo Pereira te an la awm.

Tlarhnungah erawh Jose Fonte kawppui tur a la chiang lo. Santos-a'n Tiago Djalo leh Goncalo Inacio te inkarah duh thlan tur a la nei. Kum 21 mi Lille defender Djalo hi senior team la inlan lo mah se club tan Fonte nen an khel dun. Kum 20 mi Inacio pawh Portugal senior team tan a la khel lo a, tun season-ah Sporting Lisbon tan match 21 a khel tawh thung.

Italy ve thung
Italy hi World Cup an khelh phak loh hnuin Roberto Mancini hnuaiah harhtharna an chang a, Euro C'ship-ah an champion hial. Azzuri hian qualifying round-ah pawh hneh loh tawng lo mah se draw an ngah hret a, an group aṭangin Switzerland an tling ta zawk.

Mancini-a'n January thla khan player 35 a thlang a, Mario Balotelli a tel. Tun ṭum playoff match atan hian player 33 thlang a, Manchester City striker hlui hi a tel tawh lo.

Italy coach Mancini chuan, "Kan inkhelh hun atana ṭangkai tur player chiah ka thlang. Training session kan neih tlem avangin thil thar zirna hun a awm lo. Euro 2020-a player-te khan hmun pawimawh an chang ang," tiin Super Balotelli a thlan loh chhan a sawifiah.

Italy hian position tinah player ṭha an kawl a, North Macedonia hneh thei turin an ṭha tawk. Macedonia coach Blagoja Milevski chuan, "Italy hi European champion lai an ni a, an football khelh hmang hi a danglam avangin khelh an harsa. Chutihrualin chona kan hmachhawn a ṭul," tiin a sawi.

World Cup Playoff
Path A
Semifinal - March 24, Ningani
Wales 01:15 AM Austria
Scotland PSTP Ukraine

Path B
Semifinal - March 24, Ningani
Russia* DISQ Poland
*DISQ - Russia hi an hrem avangin Poland-in final an lut.
Sweden 01:15 AM Czech Republic

Path C
Semifinal - March 24, Ningani
Portugal 01:15 AM Turkey
Italy 01:15 AM North Macedonia

Note
1. Path tin aṭangin team khat zelin World Cup an khel ang.
2. Semifinal leh final hi single leg a khelh tur a ni a, ranking sang zawk (inziak hmasa zawk) home-ah khelh tur a ni. Final khelhna tur hmun hi pawh leh tur a ni.
3. March 29, Thawhlehni zanah Playoff final hi khelh tur a ni.