Barty a chawl thut!

Ashleigh Barty chuan professional tennis a chawlhsan thu a puang! Australian nula hi kum 25 mi chauh a la ni a, world number 1 ni lai a ni - hmabak êng tak a neih laia a chawlh thu a puang hian infiamna khawvel a barakhaih hle.

Grand Slam vawi thum champion Barty chuan, "A awlsam lo khawp mai, tennis infiamnain hlimna min pek leh hetiang hmun min thlen hi ka lawm. Ka inkhelh chhunga min thlawp tlat tute chungah lawmthu ka sawi, zinkawng ngaihnawm tak kan siam ho a ni," a ti.

Tennis a chawlhsan thu hi instagram kal tlangin a sawi a, vawiin hian media a hmachhawn ang. Press mite hmaah a chawlh chhan hi a sawi chian tur thu a sawi a, chhan lian tak awm lo chuan a chawlh ngawt a rinawm lo.

Barty hian Australian Open, French Open leh Wimbledon title a la, Grand Slam pali zingah chuan US Open chu a lak loh awmchhun a ni. Kum 2019 khan a vawi khat nan Paris khawpuiah major title a la, khata ṭang khan ranking-ah pawh number 1 dinhmun a luah ta char char.

Kumin January thla khan Australian Open nomawi a chawi a, kum 44 chhunga Australian mi Melbourne Park-a champion leh thei hmasa ber a ni. An ram mipui pawhin a lakah beisei an nei sang, beisei a san vanglai takin a chawl ta si.

Barty hian a naupan lai chuan cricket pawh a khel ṭhin, chumi hnuah tennis huangah lutin world number 1 hial a ni thei. Khawtlang media ṭhenkhat tarlan dan chuan chona thar hmachhawn a duh nia sawi a awm, vawiinah a sawi chiang tura ngaih a ni.