Brazil tan Ederson a inlan dawn lo

Manchester City goalkeeper Ederson chu damlohna avangin, World Cup qualifier khel tur Brazil squad aṭangin a inhnukdawk a, Atletico Mineiro keeper Everson chuan a thlak.

Brazil tan Ederson awm lo tur hi buaina erawh a awm lo a, Liverpool keeper Alisson Becker an la nei a, coach Tite-a'n keeper pahnih hi chhawr chhawk mah se Reds keeper hi a ring zawk niin a lang.

Tun hnaia an match hnuhnung pasarihah Alisson hian vawi nga goal a veng a, Ederson hian vawi hnih a veng thung - hei bakah hian match thum khelh tur la nei mah se World Cup 2022 khel turin an tling chiang tawh.

Brazil hian Zirtawpni zing dar 5:00-ah Chile an hmachhawn dawn a, Chile hi table-ah parukna an ni mek - palina chinin World Cup an khelh dawn avangin chak ngei ngei an mamawh tawh a, hmabak match hnih an la neihah an chak a nih pawhin elpui dangte chetsual chan tel a ngai tawh dawn.

Zirtawpni zing dar 5:00-ah Uruguay an inlan ve dawn bawk a, anni hian Peru an mikhual dawn - kum 15 zet Uruguay coach lo ni tawh Oscar Tabárez chu match li a zawna an tlawm avangin Uruguay hian an ban a, Diego Alonso an lalut.

Kum 46 mi coach hnuaiah a zawna chakin table-ah palina an ni leh mek tawh a, Alonso chuan, "Final ang maiin kan khel ang," a ti a, an hnuai chiaha awm Peru tan fimkhur a ngai dawn.

Ecuador-in beisei tur nei tawh lo Paraguay an hmachhawn dawn a, an chak chuan World Cup khel turin an tling ang - Peru-in Uruguay an hneh chuan draw result hmangin an tling thei bawk.