Zaninah Churchill Vs Aizawl FC

I League khelh mekah Aizawl FC a zawnin vawi hnih an chak a, Mizo club hian zanin dar 7:30 hian Kalyani Stadium-ah Churchill Brothers an hmachhawn ang.

Aizawl FC hian Asier Pierrick Dipanda Dicka leh Samuel Lalmuanpuia te awm hnuah game hmuhnawm zawk an khel a, player ṭha pahnih hi Covid-19 vangin match hmasa lamah an inlan lo. Cameroonian striker Dicka hian match hnuhnung bera Indian Arrows an hneh ṭumin goal hnih a khung a, Churchill lakah pawh team innghahna a ni leh ang.

Churchill hian hmahruaitu Moham-medan SC meuh hneh tawh mah se match nga dangah chak an nei lo a, vawi li ngawt an chak lo. Goan club hi team chhia ni lo mah se table-ah 12-naah an awm a, champion tum ngam Aizawl FC tan hneh ngei a ṭul. Mizo club hian hnehna an chang thei a nih chuan Championship stage khel tur zingah an invawrh chho thei ang.

I League-ah hian team 13 an awm a, round tinah team pakhat an awl zel. Vawi khat ṭheuh an inkhelh kual zawhah a sang pasarihin Championship stage an zawng ang a, a hniam parukin relegation stage an khel thung dawn a ni.