United-in Ten Hag an dawr

Manchester United chuan Ajax coach Erik ten Hag an bia a, Dutch coach hi season tawp ruala an coach thar ni tura lakluh an duh. Red Devils coach ni lai Ralf Rangnick hi manager lailawk a ni a, season thar atan United hian coach thar an melh ṭan a ni.

Old Trafford thuneitute chuan an club enkawl tura ṭha ber sawi nan a la hma lutukah an ngai a, chutihrual chuan a rang thei ang bera tihfel a nih theih nan in hmakhua lawk erawh an duh tho niin a lang.

Ten Hag bakah hian Paris St-Germain boss Mauricio Pochettino pawh United-in an biak tur zingah an telh a, Sevilla coach Julen Lopetegui leh Spain coach Luis Enrique pawhin Old Trafford lung an len viau.

Barcelona coach pawh lo ni tawh Enrique erawh thlem chhuah a harsa deuh mai thei - kuminah World Cup khelh a ni dawn a, Enrique hian World Cup khelh dawnah Spain chhuahsan a duhin a rinawm loh.

United hian Chelsea talbuaina avangin Thomas Tuchel pawh an thlithlai uluk viau a, mahse, German manager hian vantlang hriatah Stamford Bridge chhuahsan lam thu sawi a la nei lo.

Kum 52 mi Ten Hag hian Pochettino ang thoin kum 2023 thleng contract a nei mek a, hei erawh buaina tur niin a lang lo - club leh mimal inrem phawt a pawimawh hmasa ang.

Ten Hag hian Ajax hi December 2017 aṭang khan a enkawl ṭan a, Dutch league-ah vawi hnih an champion a, KNVB Cup (2) leh Johan Cruyff Shield (1) a chawipui tawh a, 2018-19 season khan Champions League semifinal a hruai thleng bawk.

Dutch league khelh mekah pawh Ajax hian hma an hruai mek a, match 27 an khel tawh - match sarih chiah khelh an hmabak tawh a, point hnihin an hnuai chiaha awm PSV Eindhoven chuan an phak lo.

Erik ten Hag hian United coach lailawk Rangnick-a kalphung a ngainat thu a lo sawi tawh a, Rangnick hian United enkawl chhunzawm dawn lo mah se kum hnih chhung administration lamah a thawk zui dawn.