Super Frankie a ‘Super’ thei lo

Everton-in January thla tawp khan coach Rafael Benitez chu a hna aṭangin an ban a, coach tawnhriat nei ṭha aiah hian Chelsea legend Frank Lampard chungah rinna an nghat.

Merseyside club-in Lampard an lakluh khan an beisei chu, 'top ten' tal niin a lang a, mahse, English midfielder hlui hoin relegation battle an hmachhawn mek.

Toffees-in (Everton sawina) huat tak tein Liverpool an hua a, an ṭhenawm club-in champion nomawi pali chawi an tum mek laiin anni erawh tla thei dinhmunah an ding ta thung.

Everton fans tam tak tan chuan hei ringawt pawh hi a na a, a zahthlak tel bawk - he team hi Premier League-ah an inhamtang thei ang em, tih zawhna a awm mek a, a chhanna neitu chu anmahni an ni.

En teh, Lampard!
Player a nih laia ropui ber pawl Lampard hi coaching lam ti chi a ni lo em ni aw, tih zawhna a awm mek. May 2018 khan coach ni turin Derby County a zawm a, Championship club-ah hian a hming a chher.

Mahse, Championship club-ah pawh Premier League playoff a khelhpui tih loh chu chhuan tur a nei lo a, Championship club-a sum hmang hnem ber pawl an ni bawk - Derby hian an sum hman hnem luat an tuar mek.

Derby-ah khan a win percentage chu 42.1% a ni a, coach ṭha tia sawi tur chu a ni lo. July 2019-ah Chelsea a zawm a, a season hmasa berah ti ṭha viau mah se a season hnihnaah beisei a phak lo a, ban a ni.

Chelsea-a a win percentage hi 52.4% a ni a, Derby aiin a ṭha zawk - January 31-ah Everton an lo lang a, player a nih laia England tana vawi 106 inlan thei hian Everton sawmna a pawm.

Tichuan...
Lampard-a'n Everton tana a match hmasa berah Newcastle United a hmachhawn a, 3-1 in an tlawm nghal. Mahse, match hnihnaah 3-0 a Leeds United an hneh avangin fans beiseina a sang hman.

Everton hlim chhung chu engtia rei nge? Chhum rei lo tê langa ral leh ṭhin ang hi a ni - Leeds an hneh hnua an league match ngaah an tlawm vek a, goal an khung miah lo!

Lampard-a mualphona belchhahtu chu match ngaa goal kua an chhuah chu a ni a, top ten tal beiseia Lampard laluttu club khan Premier League inhamtan chu thupui berah an nei ta.

Everton-in Lampard an lakluh lai khan table-ah 16-na an ni a, 10-na Aston Villa chu point sarih chauhin an phak lo - tunah erawh table-ah 17-na an ni a, point 11-in table-a 10-na Leicester City an phak lo.

A thlawn mai maw!
Everton-in Benitez an ban lai khan table-ah 15-na an ni a, table-a 10-na Leicester an phak lohna chu point ruk chauh a ni - tunah erawh an inkar a zau ta hle a, coach an ban fuh lo a ni mai lo a, a thlaktu tur an la fuh lo tel bawk.

Farhad Moshiri-a'n Arsenal-a a share hralh a, Everton-a share tam zawk a lei chhan chu transfer bazar-a sum hman a châk vang a ni a, British-Iranian mi hausa hian sum pawh a hmang na hle.

Mahse, Benitez khan awmze nei loa sum hmanna chu thlak danglam a tum a, nipui transfer-ah pawh khan pound maktaduai 1.7 chiah a hmang a, hei hi Demarai Gray lakluh nana a sen a ni.

Spanish coach hian player dang zawng chu free transfer-in a la thung a, pound maktaduai 7.2-in James Rodríguez a hralh thung a, Bernard pawh £8,50,000 in an hralh a, January khan Lucas Digne chu pound maktaduai 25-in an hralh hman bawk.

Lampard beiseina
Benitez-a'n beisei ang result a neih loh avangin January-ah player a lei ve ṭan a, pound maktaduai 17 man defender Vitalii Mykolenko (Dynamo Kiev ), leh pound maktaduai 12 man defender Nathan Patterson (Rangers) te a lalut.

Mahse, Spanish coach-in a duh anga a team a siamrem hmain ban a ni a, hetihlaia match li chak zo tawh lo Everton thutlukna hi dem viau theih a ni lo - fan-ten Liverpool boss hlui a nih avangin Benitez an duh loh sa bawk si!

Everton-in Lampard an lalut a, beiseina sang tak an neih avangin sum pawh an pe nghal - beiseina sang tak nen Dele Alli chu pound maktaduai 40 thlenga a man sang chho thei turin a lalut a, player hlawh hnem Donny van de Beek chu season tawp thleng loan-a khel turin an la bawk.

Mahse, Lampard-a'n beiseina sang tak nena a lakluh player pahnih hian danglamna an thlen thei lo a, thih leh dam karah an leng ta - Lampard a inchingfel zo ang em? Nge season tawp hmain an ban dawn?

A rei lo
Lampard hnuaia league match li zet a zawna an tlawm hnuin, Everton-in vanneihthlak takin Newcastle United (1-0) an hneh mial a, inkhela goal awmchhun hi hun pek belh minute kuanaah Alex Iwobi chuan a khung.

Everton-in hnehna an chan ṭumah pawh vanneihna an mamawh a, mahse, point thum an hawn miau avangin an phur thar - an hlim chhung erawh, "A rei lo em, kan hlimlai ni," tih hla ang mai a ni.

Magpies an hneh hnu lawkah FA Cup quarterfinal an khel a, Crystal Palace lakah 4-0 ngawtin an mualpho! Lampard a lungawi lo a, an chak loh hnuah na takin a player-te a sawisel.

Lampard hian, "Inrintawkna an neih theihna tura pui tur pawhin tih theih chin tawk a awm ve a ni," a ti a, a player-te chu inrintawkna nei tura a fuih phur zawh loh thu a sawi.

Ama thiam loh!
Lampard hian a duh tawk lo. Kum 43 mi coach hian, "Wembley-a khelhna chance, quarter final match kan khel a, chutiang game-ah pawh inrintawkna in neih loh chuan inenfiah in mamawh a ni," tiin a player-te a dim lo hle.

Mahse, Blackburn Rovers tana Premier League nomawi lo chawi tawh Chris Sutton chuan Lampard a sawisel a, Sutton chuan, "A player-te na takin a sawisel a, mahse, a player-te hi a mamawh ber chu an ni si.

"Vantlang hmaa ualau taka a sawisel hian 'risk' a la tihna a ni a, a player-ten engtinnge an ngaih ang, tih chu kan hre thuai ang," a ti a, Lampard chuan a player-te a tih lungawi loh zawk a hlauh thu a sawi.

Lampard-a'n, "Premier League-ah cham kan duh a, mahse, chumi tur chuan theihtawp kan chhuah a ngai a ni," tiin March 13-a Wolverhampton Wanderers an hneh loh ṭumin a sawi a, hmabak league match 11-ah West Ham, Manchester United, Foxes, Liverpool, Chelsea leh Arsenal an la tum dawn!