Mourinho hnuaiah depression ka nei - Pogba

Manchester United midfielder Paul Pogba chuan Jose Mourinho-a'n Red Devils a enkawl laia an inhmuh thiam loh khan, depression a neih hman thu a sawi!

Pogba chuan, "Ka career-ah hian depression vawi tam ka nei tawh a, mahse, ka sawi chhuak ngai lem lo. A chang chuan depression nei tih inhre loin hun ka hmang a, mahni inkhunghran ka châk ṭhin. Mahse, hei hi nihna taka lan ngam hun a ni si," a ti.

French midfielder chuan sawi zawmin, "Manchester-a Jose Mourinho hnuaia ka khelh lai khan a inṭanin ka hria. A chang chuan, 'Tihsual ka nei em ni,' tia inrinhlelh chang a awm hial a, tawn ngai loh thil a nih chuan a harsa a ni," tiin a sawi.

Mourinho hian kum 2016 khan Pogba hi Juventus aṭangin a lalut a, pound maktaduai 89 sengin a hun laia footballer man to ber a ni hial.

United-a Louis van Gaal thlaktu Mourinho kaihhruaina hnuaiah hian League Cup leh Europa League-ah 2017 khan Red Devils-in champion nomawi an chawi a, mahse, a dawt season-ah Portuguese coach nen hian an inhmu thiam lo.

Mourinho chuan Septem-ber 2018 khan Pogba hi vice captain a nihna chu a hlihsak a, a coach-na hnuaiah Pogba chu captain a nih leh tawh ngai loh tur thu a hrilh - mahse, a hnu thla hnihah Mourinho hi ban a ni.

Pogba hian a harsatna paltlang turin a chhungte a bel tlat a, hetiang hun harsa lo tawng tawh player-te a be bawk - chung zingah chuan United tana a lo khelhpui tawh Patrice Evra a tel.

France international chuan, "Hlawhtlinna ka lo chan tawhte kha sawiselna avanga theih-nghilh ka tum lo a, mahse, a harsa a ni. Mahni maia ka ṭan zawh loh chang chuan Evra ka be nasa hle a, hetiang hun harsa lo tawng ve tawh player-te chuan kan sawi rualin min hrethiam nghal a ni," a ti.

Pogba chuan, "Sum tam tak hlawh mah ila, harsatna hian min tlakbuak lo bik chuang lo. Mi ang thoin kan lungngai thei a, sum neih vang maia hlim reng tur tihna pawh a ni lo. Mahse, football-ah chuan an pawm lo - superhero ni loin, mihring ve tho kan ni reng si," a ti a, na ve thei an nih thu a sawi.

Hetihlai hian kar hmasa Champions League-a Manchester United leh Atletico Madrid inkhelh ṭum khan Pogba te chenna in chu rawk a ni a, France tana World Cup 2018 nomawi an chawi ṭuma a champion medal chu ruk zingah a tel.