Reds leh City Mayor-ten FA Cup khelhna sawn duh

FA Cup semifinal-a inhmachhawn tur Liverpool leh Manchester City innghahna khawpui Mayor-te chuan Wembley Stadium-a semifinal khelh tur chu, a khelhna hmun sawn an duh thu an sawi.

English football-a inelna ngaihhlut hlawh FA Cup semifinal hi April 16 & 17-ah khelh tura ruahman a ni a, mahse, hnathawh kal mek avangin April 15-18 inkarah, Manchester leh Liverpool khawpui aṭangin London-ah train tlan a awm lo.

He thil avang hian Greater Manchester mayor Andy Burnham leh Liverpool mayor Steve Rotheram te chuan, "Semifinal hi fan-ten awlsam taka an pan theih tur hmunah khelh ni se kan duh a ni," an ti a, Football Association hnenah lehkha hmangin ngenna hi an thlen dun a ni.

Khawpui pahnih Mayor-te chuan, "London pan nghal tur train hmanga an kal theih loh chuan fan-te chu motor emaw, thlawhtheihna emaw, rail kawng kikawi tak hmangin an kal a ngai dawn a ni," an ti a, motor hmanga fans kal an tam chuan chhiatna a thlen theih thu an sawi bawk.

Burnham leh Rotheram te chuan kum tawp lam khan FA hnenah train lama buaina a awm theih thu an sawi tawh niin an sawi a, lehkha an thawn hma hian FA chuan club pahnih leh Network Rail & National Express te nen inbiakna an lo neih tawh thu an lo sawi tawh bawk a ni.