PBL hmahruaitu North Eastern Warriors

North Eastern Warriors chuan Thawhlehni zan khan Chennai Superstarz chu 4-3 a hnehin Premier Badminton League khelh laiah hmahruaitu an ni a, inkhel dangah Bengaluru Raptors chuan Mumbai Rockets 5-0 in an sawp bawk.

Gachibowli Indoor Stadium, Hyderabad-a intawng team pahnih North East leh Chennai te hi semifinal lut chiang tawh an ni a, chak loh a pawi lutuk lo. Mahse, Chennai hi an chak loh avangin an hmahruaina a tawp a, knockout stage-ah team ṭha zawk hmachhawn thei an ni dawn.

Inkhel dangah champion lai Bengaluru Raptors chuan semifinal beiseina chhi nung turin a hniam bera awm Mumbai an sawp. World Championship bronze medalist B. Sai Praneeth chuan Trump Match atan an thlan mipa singles-ah India tlangval dang Parupalli Kashyap 15-14, 14-15, 15-14 in a hneh.

Nizan khan beisei nei tawh lo Hyderabad Hunters leh pathumna Pune 7 Aces te an inhmachhawn a, result kan hre hman lo. Zanin hian Bengaluru Raptors leh Awadhe Warriors ten a sang pali zinga tel tur zawk an chingfel ang.