Manchester khaw club tan knockout stage a hnai
Tun dinhmuna English club ṭha ber Manchester City leh Premier League history-a ropui ber Manchester United te chu zanin hian Champions League-ah inlan dawn a, knockout stage lut turin an dinhmun a ṭha ve ve.
City hi Group F hmahruaitu an ni a, Pep Guardiola hote hian Parc Olympique Lyonnais-ah mualneitu Lyon an hmachhawn dawn. Etihad Stadium-ah French club hian hnehna an chang a, English club tan tun hi phuba lakna remchang a ni thei ang.
United hi group H-ah awmin match hnuhnung bera Juventus khualmuala an awm avangin an dinhmun a ṭha a, zanin dar 1:30 hian Swiss club Young Boys an mikhual dawn. Hemi hun vek hian Italian champion Juve leh Valencia te an inhmachhawn bawk ang.
City tan chona
Manchester City-in Pep Guardiola awm hma pawhin Premier League nomawi an chawi tawh a, Spainish manager an lakluh chhan tak erawh Europe thlenga ram zauh an duh vangah a ngaih theih. Pep hian Barcelona a enkawl chhungin Champions League nomawi vawi hnih a chawi a, hemi hnu hian Bayern Munich-ah kalin kum thum chhungin Bundesliga nomawi chawi vek mah se Europe-ah erawh semifinal-ah an tla vek.
City-ah a che ṭha bik lo, season liam ta khan hnehsawh takin Premier League-ah an champion a, Champions League-ah erawh an hnuaia awm Liverpool hneh loin quarterfinal-ah an tla a, English club a enkawl hmasak ber ṭum pawhin Monaco hneh loin last 16-ah an tla. City tan chauh ni loin Pep-a tan Europe inelnaa champion hi chona a tling.
Beiseina thar
Pep-a hnuaiah City an ṭha telh telh a, Champions League match hmasa bera Lyon an hneh loh tih loh chu tun season-ah chak loh an nei lo. French club an hneh loh hnuah City-in insiam ṭhat nan hun erawh an mamawh a, chutihrualin an match hnuhnung bera Shakhtar Donetsk 6-0 zeta an sawp avangin Lyon hmachhawn nawn turin an inpeih.
Hei chauh hi a ni lo, Premier League lamah pawh an match hnuhnung berah West Ham 4-0 in an sawp. Pep-a hote hian goal an khung ringawt lo a, an tlarhnung a phui bawk avangin an tan knockout stage chu lawmna tur a awm lo a, nomawi chiahin lawmna a siam sak a rinawm.
Lyon hian City an hneh hnuah Champions League-ah chak an nei leh miah lo a, Shakhtar nen 2-2 a an inhnehtawk hnuah Hoffenheim nen vawi hnih an inhnehtawk. French club hian Nabil Fekir, Memphis Depay leh Moussa Dembélé te kawl mah se tun dinmunah chuan City elpha tur niin an lang lo.
Dinhmun ṭha United
Manchester United hi inelna ṭan hma aṭanga knockout stage lut tura ngaih an ni a, amaherawhchu City anga thleng thui tura beisei erawh an ni lo. Jose Mourinho hian Crystal Palace nena inhliam defender Victor Lindelof a chhawr theih a rinawm lo a, Swede defender thlak tur hian Eric Bailly a rawn luh a rinawm.
United hian khualmualah Young Boys 3-0 in an hneh tawh a, tute pawh khel se Mourinho hoten hnehna an chang lo a nih chuan mualphona a ni ang. English club-in knockout stage an luh theih nan an player hlui Cristiano Ronaldo an mamawh tel bawk a, Portugal captain ho hian Juventus-in Valencia an hneh theih chuan United hmabak a awlsam sawt dawn.
Old Lady hian kar tawpah SPAL 2-0 in an hneh a, Ronaldo hian goal hmahruai khungin Juventus history-a goal 10 khung tling thei hmasa ber a ni a, double digit khung tling tur hian match 16 chauh a mamawh. Italian champion hian khualmualah Ronaldo-a'n red card a hmu chungin Valencia an hneh thei a, hei vang hian Juve hi Spanish club lakah rinkai zawk an ni ang.
Group F: Lyon (6) v Manchester City (9), Hoffenheim (3) v Shakhtar Donetsk (2)
Manchester City : Tlang turin draw an mamawh a, pakhatna ni turin chak a ngai thung.
Lyon : An chak chuan knockout stage an lut ang. An inhnehtawk a, inkhel dangah chak zawk an awm loh bawk chuan Hoffenheim aia an head to head a ṭhat zawk avangin an tlang tho ang
Hoffenheim : An chak lo a nih chuan pahnihna nih beiseina a tawp ang a, a nih loh pawhin an inhnehtawk a, Lyon-in point an hmuh bawk chaun an tla tho ang. Chutihrualin an chak erawh chuan Hoffenheim tan knockout stage luh beiseina a awm chhunzawm zui dawn.
Shakhtar : Lyon an chak emaw inkhel pahniha chak zawk an awm loh ve ve chuan pahnihna nih a beiseiawm tawh lo. An chak lo a nih phei chuan palina an ni chiang bawk ang.
Group H: Juventus (9) v Valencia (5), Manchester United (7) v Young Boys (1)
Juventus : Point an hlawhchhuah emaw United an chak loh chuan an tlang.
Man United : Hnehna an chan a, Valencia an chak zawh loh bawk chuan an tlang.
Valencia : An chak zawh lo a, United an chak si chuan knockout beiseina a tawp ang.
Young Boys : Pathumna (Europa League khelh theihna) beiseina nei chhunzawm turin chak an mamawh.
UCL - Fixtures & Standings
Zanin Inkhel Tur
AEK Athens 11:25 PM Ajax
CSKA Moskva 11:25 PM Viktoria Plzen
Bayern München 1:30 AM Benfica
Hoffenheim 1:30 AM Shakhtar Donetsk
Olympique Lyonnais 1:30 AM Manchester City
Roma 1:30 AM Real Madrid
Manchester United 1:30 AM Young Boys
Juventus 1:30 AM Valencia
November 28, Nilaini Zan Inkhel Tur
Atlético Madrid 11:25 PM Monaco
Lokomotiv Moskva 11:25 PM Galatasaray
Borussia Dortmund 1:30 AM Club Brugge
PSV 1:30 AM Barcelona
Tottenham Hotspur 1:30 AM Internazionale
PSG 1:30 AM Liverpool
Napoli 1:30 AM Crvena Zvezda
Porto 1:30 AM Schalke 04
GROUP E
# Team Pld W D L GF GA GD Pts
1 Bayern Munich 4 3 1 0 7 1 6 10
2 Ajax 4 2 2 0 6 2 4 8
3 Benfica 4 1 1 2 4 6 -2 4
4 AEK Athens 4 0 0 4 2 10 -8 0
GROUP F
# Team Pld W D L GF GA GD Pts
1 Manchester City 4 3 0 1 12 3 9 9
2 Olympique Lyonnais 4 1 3 0 9 8 1 6
3 Hoffenheim 4 0 3 1 8 9 -1 3
4 Shakhtar Donetsk 4 0 2 2 4 13 -9 2
GROUP G
# Team Pld W D L GF GA GD Pts
1 Real Madrid 4 3 0 1 10 2 8 9
2 Roma 4 3 0 1 10 4 6 9
3 CSKA Moskva 4 1 1 2 4 7 -3 4
4 Viktoria Plzen 4 0 1 3 3 14 -11 1
GROUP H
# Team Pld W D L GF GA GD Pts
1 Juventus 4 3 0 1 7 2 5 9
2 Manchester United 4 2 1 1 5 2 3 7
3 Valencia 4 1 2 1 4 4 0 5
4 Young Boys 4 0 1 3 2 10 -8 1