FIFA aiawhin Baby League tlawh

Inrinni khan Prince Rufus, FIFA Development officer for South Asia chuan Aizawla Baby League thar pahnih GNT Enterprise Baby League, Sihphir Venghlun leh LBS Suzuki Durtlang Leitan Baby League te a tlawh.

Mizoram mai ni lo India rama Baby League hmasa ber chu nikum October thla khan MFA, Champhai DFA leh 8One Foundation ṭangkawpin Chhangphut Field-ah ṭan a ni.

Hei bakah hian AIFF-MFA hnuaiah November thla tir khan Lunglei DFA kaihhruaina hnuaiah Zobawk playground-ah ṭan a lo ni tawh bawk a ni.

AIFF development officer Samson Ramengmawia chuan, "Baby League aṭang hian player naupang zawkin inelna rilru an pu thei dawn a, hei hian football career-ah nasa takin a pui thei dawn a ni. Zobawk, Sihphir Venghlun leh Durtlang Leitan ten Baby League an buatsaih thei hi a lawmawm a, tute tan pawh buatsaih theih a ni," tiin a sawi a, Lunglei Bazar Vengah ṭan a ni thuai dawn.

Baby League operator-te hian an kalpui dan azirin AIFF aṭangin Rs 85,000 a dawn theih a, hre chiang duh tan chuan MFA Office-ah zawhfiah theih a ni.