Vawiin aṭangin MPL8 khel tur zawng dawn

Mizoram Premier League khel tur zawnna qualifier chu vawiin aṭangin Lammualah khelh ṭan a ni dawn a, Kanan FC leh Venghnuai FC te tlai dar 1:30-ah an inhmachhawn ang.

MPL Qualifier-ah hian Kanan FC, Venghnuai FC leh New Serchhip te an inel dawn. Vawi khat ṭheuh an inkhelh kual hnuah a sang berin MPL an khel ang a, pahnihna hian Ramhlun North FC nen playoff hmangin Mizoram league sang bera khel tur hi an zawng leh ang.

Aizawl DFA First Division League-ah Kanan leh Venghnuai te hi an awm ho a, league round-ah Venghnuai hian 1-0 in hnehna an chang. Semifinal-ah erawh Kanan FC-in 2-1 in hnehna an chang thung. First division champion Aizawl FC Academy erawh an senior team MPL-ah an awm tawh avangin qualifier an khel thei lo tih hriat erawh a ṭha.

Kanan FC manager Lalram-nghaka Pautu chuan, "MPL khelh hi kan duh tak tak a, chuvangin player pawh kan la thar a ni. Electric Veng forward David-a leh Chaltlang FC keeper David-a te kan lalut," tiin Vanglaini a hrilh.

MFA hnuaia club-te hian tualchhung player loan hmangin pahnih an lalut thei a, Kanan FC-in MPL7-a goal ruk khung thei David Lalchhuanawma an lalut thei leh an chak lohna goalkeeper-ah Aizawl FC Academy aṭanga inzir chhuak goalkeeper David Lalrinpuia an nei thei hi chanchin ṭha a ni.

MPL8 Qualifier
Vawiin Inkhel Tur
Kanan FC 1:30 PM Venghnuai
November 29, Ningani
New Serchhip 1:30 PM Kanan FC
December 1, Inrinni
Venghnuai 1:30 PM New Serchhip