Real leh Solari tan fiahna hun

Eibar laka tlawm hlim Santia­go Solari enkawl Real Madrid-in zanin dar 1:30-ah fiahna hautak an hmachhawn dawn a, an hmaa ding tur hi AS Roma an ni.

Team pahnih hian Group G-ah point kua ve ve nei tawhin match li ve ve an khel tawh a, a chak zawk-in last 16 an lut chiang ang.

Group G-ah tho hian CSKA Moscow chu point li hmuin last 16 luh la beisei ve tho an ni a, zanin dar 11:25-ah Viktoria Plzen nen an inhmachhawn dawn - hnehna an chan chuan Real leh Roma inkhela chak lo zawk tan an hlauhawm ang.

Real Madrid hi an match hnuhnung bera 0-3 ngawta Eibar ngam lotu kha an ni a, Roma an ropui bik lo. An league match hnuhnung berah Udinese chu 0-1 in an ngam lo a, Real laka chak beisei ngam a harsa.

Aw Solari!

Real Madrid-in match li an chak zawn hnuah coach lailawk Solari chu manager nghet ni turin an lalut a, mahse Argentine manager hian manager nghet a nih hnua a match hmasa berah a chak lo nghal.

Manager nghet Solari hnuaia Real Madrid-in manager lai­lawk Solari hnuaia Real an phak lo a, zanin hi Real tan in­siamṭhatna remchang a ni nghal ang - Roma an hneh phawt chuan an tihsual te hriatreng sak an ni lo ang!

Real Madrid captain Sergio Ramos chuan Eibar an hneh loh ṭumin, "An level kan phak lo a ni," a ti a, Eibar laka Real captain ṭawngkam atan chuan tlawm thlak tak a ni - mahse thudik a ni miau si.

Solari pawhin hmasawn ngaihna an neih thu a sawi a, Real fan-ten zaninah chu 'hma­sawnna' chu hmuh an inbeisei dawn a, Roma khel­mualah Real chak an beisei ang.

Real leh buaina

Real-in Eibar an ngam loh avangin sawiselna an tawk nasa a, Julen Lopetegui hoa 3-0 ngawta an hneh tawh team lakah hian an tho thei ang em, 'nge an mualpho nawn dawn tih chu zawhna a ni a, siamṭhat ngai lai tam tak a awm.

Eibar khelmual lian lo takah an inkhel dawn tih hriain Solari-a'n pressing game khelh aiin long ball a thlang a, a tisual chiang hle. Midfield laiah Toni Kroos leh Luka Modric an nil ṭhak a, ball kang umtu Karim Benzema lah vawi duai lo a 'offside' bawk.

Real chak lohna pakhat chu tlarhnung a ni bawk. Tun season-ah match 19 khel tawhin match sarih chiah goal chhuah loh an nei - Atletico Madrid (UEFA Super Cup (4-2), Sevilla (3-0), Barcelona (5-1) leh Eibar (3-0) lakah goal thum aia tam an chhuah tawh.

Roma laka hnehna chang tur chuan Real hian an chak lohna lai zawng zawng an siamṭhat a ṭul dawn a, Italian club laka insiamṭhat 'thut' hi a harsa ang tih a chiang.

Hei le Dzeko

Real Madrid-in hlauh tur an nei a nih chuan Edin Dzeko hi an ven uluk bik tur a ni ang. Kum 32 mi striker hi an league match hnuhnung berah hahdamtir a ni a, Champions League match thuma goal nga khung tawh striker hi tlarhnung pawp Real tan ven uluk a ṭul ang.

Dzeko nena tlarhmaa in­kawp tur Cengiz Under sawi hmaih a thiang lo. Kum 21 mi striker hi nipui transfer laia European club lian ho chil ti puttu a ni a, tlarhmaa Dzeko nena an inkawp hi Real tan buaina thlen turin an ṭha tawk.

Mahse, Roma hian dam kimin Real an hmachhawn thei dawn lo. Javier Pastore leh Diego Perotti-te chu an dam hman a la rinawm lo a, international break laia inhliam Kostas Manolas chu a inlan a beiseiawm lo bawk.

Hetihlai hian Lorenzo Pel­legrini leh Aleksandar Kolarov-te chu an dam tawh a, league match hnuhnung berah pawh an inlan avangin Real hmachhawn thei tura beisei an ni.

Real tan tu nge?

Real Madrid tan Nacho leh Casemiro te inhliam a la dam chian loh avangin Roma an hmachhawn thei dawn lo a, Eibar laka hliam vanga lakchhuah Alvaro Odriozola tan inlan tur chuan a la hma mah mah bawk.

Hun rei tak hliam vanga a chawlh hnuah Dani Carvajal chu Eibar lakah Odriozola inhliam avangin luhtir a ni a, Spanish right back hi Roma lakah chuan first XI chang leh thei tura beisei a ni.

Eibar laka inkhel bul ṭan Dani Ceballos-a'n a khel chhe takzet a, Roma lakah chuan a aiah Isco chu inkhel bul ṭan tir beisei a ni a, Marco Asensio aiah Lucas Vazquez chu luhtir a nih a rinawm bawk.

Gareth Bale leh Karim Benzema chu tlarhmaah Real tan innghahna an ni leh dawn chiang a, Eibar anga an khelh chuan Roma lakah chak beisei chi a ni lo ang.