Davis Cup champion Croatia

Ram leh ram mipa tennis team hmanga inelna Davis Cup chu Pathianni zan khan final khelh zawh niin Croatia chuan champion lai France 3-1 a hnehin a vawi hnih nan an champion.

Davis Cup hi best of five hmanga inelna neih ṭhin a ni a, Zirtawpni zan aṭanga khelh niin Pathianni zan thleng khelh ṭhin a ni. Inkhel hnuhnung berah Croatia tan US Open champion hlui Marin Cilic chuan Lucas Pouille lakah 7-6, 6-3, 6-3 a hnehna changin an ram hi nomawi a chawipui.

Kum 30 mi Cilic chuan, "Khawvel pum champion nih hi thil awlsam a ni lo a, dam chhunga tawn fo theih pawh a ni lo. Tunah chuan kan duhthusam leh suangtuahna te chu a takin a thleng dik ta. Fans puihna kan dawng ṭha a, kan ram lamah theihtawp chhuaha min ṭan tute chungah pawh lawmthu kan sawi," a ti.

Kum 2005 khan Croatia hian final lut mah se an champion zo lo. Kuminah erawh an che fuh hle a, Cilic ten match an khelh hma hian 2-1 in hma an hruai sa - Cilic a chak leh takah chuan Jo-Wilfried Tsonga leh Borna Coric ten match hnuhnung ber an khelh tur chu khelh kher ngai loin chak zawk a chiang hman a ni.