Hma lam panin Arsenal an kal zel
Arsenal chuan tun hnaia tlawm loa an kal tluanna an chhawmnung zel. Pathianni zan khan Gunners hian Bournemouth 2-1 in an hneh a, Unai Emery kaihhruaina hnuaia an match hnuhnung 17-ah tlawm an nei lo.
Spanish manager kaihhruaina hnuaia an kaltluan vanglai khan match 10 an chak zawn a, chutih rualin tun hnai an match hnuhnung panga zinga paliah an inhnehtawk thung.
Vitality Stadium-ah midfielder Jefferson Lerma-a'n anmahni lama a tih luh bakah Pierre-Emerick Aubameyang chuan tun season Premier League bika a goal riatna a khung bawk. Emery naute hi khualmuala an league match bikah vawi li an chak tling ta a, season hmasa tluana an record chu an nihrual der tawh.
Aubameyang bawk
Season tir an match hmasa pahnihah Aubameyang chu tlarhma a maltlat tir a ni a, an khingpui kha Chelsea leh Manchester City an nih avangin an hlawhtling lo. A hnu lamah erawh Emery-a'n a laiah Alexandre Lacazette dahin, Gabon international hi a sirah dah a ni zawk ṭhin.
France international Lacazette a inlan theih loh zanah Aubameyang chu maltlat tir nawn leh a ni a, amah thlawp turin Alex Iwobi leh Henrikh Mkhitaryan te an awm bawk - Goal khung tuma Gunners lamin an pet vawi 20 zinga 14 chu anni pathum ke aṭang chhuak hi a ni.
Mesut Ozil leh Aaron Ramsey te bench-ah dah an ni a, North London club hi point hnih hloh thei dinhmuna an din hnuah defender Sead Kolasinac siamsak chu Aubameyang-a'n chakna goal ni turin a khung.
A zawnin vawi thum
Bournemouth hian season bul an ṭan fuh a, mahse tun hnai an match hnuhnung pathumah an tlawm vek ta. An match hmasa 10 china an tlawm aiin a tam ta! Eddie Howe nau ten Gunners lakah huaisen takin bul ṭan mah se an vannei tawk lo.
David Brooks-a goal khung chu offside vangin pawm a ni lo a, goal khat an phurh hnuah Brooks hian counter attack aṭangin Joshua King goal khung tur a siamsak tho. Anmahni lama ti luttu Lerma chuan hla deuh tak aṭangin vanneihna zawng mah se a ball pet ṭha tak chuan ban a per hlauh.
Bournemouth manager Howe chuan, "Ṭha takin bul kan ṭan a, kan naute khan an theihna zawng zawng sengin Arsenal an hmachhawn. Goal khat pawm sak kan ni lo a, thutlukna dik lo kan tuar. Point khat tal hmu chunga khelmual chhuahsan kha kan phu a ni," tiin a sawi.
A la tawk lo
Hnehna changtu Arsenal manager Unai Emery pawhin point thum hmu mah se a naute khelh dan chu a la tawk loh thu a sawi. Gunners leh City te chiah hi tun season EPL bika chawlhlawk hma lama hmahruaitu la ni lo an ni.
Emery chuan, "Match 17 chhung tlawm loin kan kaltluang ta a, mahse hei hi a tawk zo lo, match ṭhenkhatah khan kan khingpui te nen kan inhnehtawk a ni. Inkhelh ṭan hma khan Bournemouth hmachhawn a harsat tur thu kan sawi lawk a, hnehna kan chang thei erawh a lawmawm hle," tiin a sawi.
Arsenal hian an match lehpek atan chuan Ningani zan hian Ukrainian club Vorskla Poltava an lenchilh dawn a, kar tawpah an hmelma Tottenham nen North London Derby an khel zui leh dawn a ni.
Mooy goal hnih
Pathianni zan inkhel pakhat zawkah Huddersfield chuan Aaron Mooy-a goal hnih hmangin Wolves 2-0 in an hneh. Wolves hian tun hnaia point 15 hmuh theih zingah point khat chiah an hlawh chhuak a ni.
Wolves manager Nuno Espirito Santo chuan, "Ka naute hi tlarhma leh a hnung lamah an thawhhona a ṭha tawk lo deuh ṭhin a ni. Tun ṭuma kan match bik hi chu tun season chhung kan khelh chhiat ber a ni hial ang," a ti a, a chinfel dan tur a ngaihtuah thu a sawi bawk.