Weightlifting-ah Mizoramin gold, silver leh bronze medal la

Indian Weightlifting Federation hnuaia inelna - IWLF Youth, Junior leh Senior National Weightlifting Championship-ah Mizoram an che ṭha. Mizoram hian Junior National (67kg category) ah gold leh bronze medal pakhat ve ve a la. Youth National-ah silver medal medal pakhat an la bawk.

Inelna hi KIIT University, Bhubaneswar-ah neih mek niin, Nilaini zan khan Lalnunthara chuan 67kg huangah gold medal a chawi chhuak. Pakhatna ni tur hian snatch 117, clean & jerk 152, total-ah 269 a chawi chhuak a ni.

Lalhunthara hi Thutak Nunpuitu Team (TNT) naupang a ni a, 2016 aṭang khan Army Sports Institute (ASI), Pune lamah a lut thla. Amah ang bawkin Jacob-a pawh hi ASI aṭanga inzir chhuak a ni ve bawk.

Bronze medal la turin Jacob Vanlaltluanga chuan - snatch 16, clean & jerk 141, total-ah 257 a chawi thung. Youth inelna lamah 61kg huangah Silvan Beirothatlo chuan - snatch 108, clean & jerk 143, a pumpuiah 251kg chhawiin hlawhtlinna a chang bawk.

Inelna neih laiah hian Zakhuma chuan 61kg huangah silver medal a lo la tawh bawk a, a result hian inter state senior national-a 61kg huangah bronze medal a dawng bawk a ni.

Mizoram manager Malsawma Khiangte chuan, "Kan nauten an mahni tawkah an ti ṭha. School lamah exam zo hlim an ni a, hrileng vangin inbuatsaihnain duhthu a sam tawk lo bawk. Amaherawhchu, state dang pawhin zirna leh hripui vangin buaina an tawk ve tho a ni," tiin Vanglaini a hrilh.

Vawiin hian Lalruatfela (youth) chu 81kg huangah a inlan dawn. Mizo nula Lalchhanhimi pawhin March 27, Pathianni hian senior huanga inelna a hmachhawn bawk ang.

Youth Olympic gold medalist Jeremy Lalrinnunga erawh a inlan dawn lo. Jeremy-a hi United States lamah World Junior Championship leh Commonwealth Games atan inbuatsaihna a nei dawn a ni.