EPL Hall of Fame-ah Vieira leh Rooney

Arsenal captain ropui Patrick Vieira leh Manchester United legend Wayne Rooney te chu Premier League Hall of Fame-ah lakluh thar an ni. EPL player ropui bikte huang hi an buatsaihna a la rei lo a, player an lakluh belh chho zel ang.

Rooney hian EPL match 491 a khelh aṭangin goal 208 a khung a, assist vawi 103 a nei bawk. Goal khung hnem lamah Alan Shearer chauh a tluk lo, ṭhiante khung tur siamsak kawngah pawh tluk loh pahnih chiah a nei hial.

Man United striker hlui chuan, "Player ropui tak tak an awm tawhna Premier League Hall of Fame-a ka hming a awm ve mai hi, ka tan chuan chawimawina ropui tak a tling," tiin a sawi.

Kum 16 mi chauh a nih laiin Rooney hian EPL goal a khung ṭan. Everton tana a theihna a pho chhuah hnuah Man United a zawm. Old Trafford-ah hian league nomawi vawi nga a chawi, heng zingah hian a zawna vawi thum a chawi pawh a tel.

Goal khung leh assist aṭanga kan teh chuan Vieira hi a ropui tehchiam lo a ni mai thei. Mahse, kum 1996 aṭanga 2005 chhung Arsenal midfield a awp dan hmutu tan erawh Vieira hi engti kawng zawng mahin sawi nep theih a ni lo.

EPL nomawi vawi thum chawitu Vieira chuan, "Premier League Hall of Fame-ah ka tel dawn tih ka hriat khan ka lawm takzet a, thil lawmawm bik zinga mi a ni. Ka vannei a, player ropui Thierry Henry leh Dennis Bergkamp te ka khelhpui.

"Anni pahnih kha Hall of Fame-a lakluh an ni tawh, kan kianga player ṭha tak tak an awm chuan an zarah kan lang mawi ve ṭhin," tiin inngaitlawm takin a sawi. Vieira hian tunah chuan Crystal Palace a enkawl mek.