Final khel turin RVL an tlang

Inkhel pawimawhah Ramhlun Venglai chuan Kulikawn chu run 14-in an hneh a, tualchhung cricket inelna ngaihhlut Mahuma Memorial 1st Division Screening Tournament 2021-22 final an inhlangkai.

RVL hian match sarih khelh aṭanga vawi nga hnehna changin, team pariat inel zingah pakhatna an ni. An hnuai chiaha awm Chhinga Veng nen March 29, Thawhlehni hian nomawi an inchuh ang.

Nilainia Suaka Cricket Ground, Sihhmuia inkhelah Ramhlun Venglai hi ṭhum vawra vannei zawk an ni a, vuak hmasak an thlang. Joseph Lalthankhuma'n run 76 a siam a, run 62 siamtu Remruatdika Ralte a che ṭha bawk.

RVL hian over 50 chhungin run 231 an siam a, target sang pangngai tak ni mah se, team ṭha Kulikawn tan umphak theih a ni. Chak tur chuan RVL ball vawm thiam ten an hna ṭha taka an thawh a ngai tihna a ni.

Kulikawn lamah mimal che ṭha fal an awm lo. Chutihrualin player pasarih ngawtin run 10 chuang an siam thei a, beiseina sang tak pawh an nei hman. Mahse, over 50 chhungin run 217 bak an tlin thei lo a, pathumna ni chunga inelna an mangṭha a ngaih phah.

Mahuma Memorial-ah hian tualchhung cricket team ṭha pariat an inel a, vawi khat ṭheuh an inkhelh kual hnuah a sang pahnihin nomawi an inchuh dawn a ni.