Chelsea fan-ten Ricketts chhungkua an duh lo

Roman Abramovich hrek a nih avanga Chelsea hralh tumnain thawm a neih chhunzawm zel a, ualau taka Chelsea lei an duh thu tilangtu zingah Ricketts chhungkua chu Chelsea fans lamin an duh lo hle.

Ricketts chhungkua hian Major League Baseball club Chicago Cubs an nei mek a, Blues fan-te chuan club an kaihhruai danah duhkhawp loh an nei sa a, Chelsea neitu atan an iai.

Chu chauh a ni lo - kum 2019 khan chhungkaw pa ber Joe Ricketts chuan Muslim sakhua chungchang a mawi lo zawngin a lo sawi tawh a, inthliarna lam hawi ṭawngkam lo nei tawh sa hnuaia kun hi Blues fan-ten an duh lo a ni ber.

NO!
Chelsea mihang player hmasa ber Paul Canoville chuan, "Ka hmuin ka hre tam tawk tawh e. Chelsea Supporters' Trust lamah ka ṭang a, Ricketts chhungkuain kan club lei an tumna hi chi inthliarna dodal chungin ka duh lohzia ka lantir a ni," a ti.

Chelsea's Chicago official suppor-ters group hotupa leh Cubs fan ni bawk Brian Wolff chuan, Ricketts chhungkuain Chelsea lei an tumna chu hnawl turin thuneitute a ngen ve bawk.

Wolff chuan Ricketts chhungkua leh politics lama an thawhpuite pawh rin harsa a tih thu a sawi lang. Ricketts chhungkua hi Republican Party an ni a, an fate zinga mi Laura erawh Democrat a ni thung.

Ni lo e...
Nilaini khan Ricketts chhungkua chuan thuchhuah siam ve nghalin, kum 2019-a an pa ṭawngkam avanga puhnate chu an pha a, Ricketts chuan, "Huatna tuh thei thil reng reng chu kan chhungkua chuan kan do tlat.

"Chi inthliarna leh Islam sakhua huatnate hian hmun a chang lo a, Chicago-ah pawh Muslim-te nen inpawh tlang takin kan awm a, chutiang bawkin sakhua leh hnam hrang hrangte nen lungrual takin kan thawk ho a ni," an ti.

Ricketts chuan, "Kan chhungkua chuan chi leh hnam hrang hrang inpumkhatna hi kan thupui ber chu a ni mai. Chelsea lei kan tumna hi a hlawhtling a nih chuan, heng inpumkhatna hi thupui berah kan nei tlat dawn a ni," tiin an sawi.

Cubs sulhnu
Chelsea fan-ten Ricketts an duh loh chhanah Cubs an enkawl danin sawi a hlawh a, chutihrual chuan, thlir thuak thuak chuan an tichhe lutuk lo niin a lang.

Ricketts hian kum 2009 khan Cubs hi an lei a, kum 2016 khan kum 108 chhunga a vawi khat nan World Series an la - baseball club-ah hian Joe Ricketts-a fate pali Pete Ricketts, Thomas S. Ricketts, Laura Ricketts leh Todd Ricketts te chu mawhphurhna latu ber an ni.

American sumdawng hausa chhungkua hian Cubs khelmual Wrigley Field leh a chhehvel pawh an sa ṭha vek a, hemi atan ringawt hian pound maktaduai 750 vel an seng - a nep lo hle.

Hahdamna
Chelsea fan-ten thu lengvak aṭangin Ricketts chhungkua an duh lo viau a, an duh loh chhan langsar ber, pa ber Joe Ricketts chu Chelsea lei tumnaah hian a inrawlh dawn lo niin an sawi bawk.

Joe-a fate zinga pathum Tom, Todd leh Laura te chuan Chelsea lei tumna hi an buaipui a, Republican Party thlawptu an nihna chu fans tam takin duh loh phah mah se Laura hi a unaute ang lo takin Democrat a ni thung.

Ricketts chhungkua hian Chelsea fan-te nen inbiakna neih pawh an duh nia sawi a ni a, Chelsea Supporters' Trust leh Chelsea Pitch Owners nen inbiak an duh. Chelsea leh Fulham MP Greg Hands chu an titi pui tawh bawk.

An hausakna
Ricketts chhungkua hausakna hi dollar tluklehdingawn nga vel a ni a, kum 1997-a pa berin brokerage firm Ameritrade a din chu an hausak bul ṭanna a ni a, sumdawnna hrang hrangah an inhmang nasa hle.

American sumdawng hausa chhungkua hian Ken Griffin an thawhpui nia sawi a ni a, Citadel LLC dintu Griffin-a hausakna hi dollar tluklehdingawn 28.5 nia sawi a ni - a nep lo.

Chelsea hralh chungchang buaipuitu Raine Group chuan Blues lei duhtute hi tun kar chhungin an thlifim leh dawn a, thlitfim zinga tel hmasak hi Ricketts tan chuan a pawimawh - Raine chuan tun thla tawp hmain Chelsea hi hralh fel hman an inbeisei.

Chelsea lei tum langsar
• Liverpool chairman hlui Sir Martin Broughton leh a thawhpuite, an zingah hian London 2012 Olympic Games hotupa Lord Coe a tel.
• Major League Baseball team Chicago Cubs neitu Ricketts chhungkua pawh an tel a, anni pawh hi thawhpui nei tur tho an ni.
• Swiss billionaire Hansjorg Wyss leh US mi Todd Boehly te chuan Chelsea lei tum hian pawl an din a, American PR executive Barbara Charone, British sumdawng Jonathan Goldstein leh British journalist Daniel Finkelstein te chu an pawlah hian an tel.
• London-a hmunpui nei, investment firm Aethel Partners chu lei duhtu zingah an tel a, anni hi an hotupa chu Portuguese entrepreneur Ricardo Silva a ni.
• British multi-millionaire Nick Candy a langsar a, ani hi Chelsea striker hlui leh Tifosy company neitu zinga mi Gianluca Vialli, South Korea company Hana Financial Group leh London-a hmunpui nei C&P Sports Group ten an thawhpui.
• NBA team Philadelphia 76ers neitu Josh Harris hming a ri a, ani hian Crystal Palace-ah pawh share a nei.
• American football club New York Jets neitu Woody Johnson leh Saudi Arabia lama inkulh sumdawng intelkhawm pawh sawi rik an ni.
• Tun hnai khan investment firm lar tak Centricus chuan Chelsea lei an duh thu an sawi ve leh a, anni hi London-a hmunpui nei sa an ni.